రతన్ టాటా పేరు తెలియని వారంటూ ఉండరు. దేశంలోని గొప్ప పారిశ్రామికవేత్తల్లో రతన్ టాటా ఒకరు. పారిశ్రామిక రంగంలో ఆయన సేవలు నిరుపమానం. టాటా గ్రూపు ఛైర్మన్‌ బాధ్యతల నుంచి వైదొలిగిన తర్వాత ఆయన టాటా ట్రస్ట్‌కు ఛైర్మన్‌గా కొనసాగుతున్నారు.
సామాజిక మాధ్యమాల్లో చురుగ్గా ఉండే రతన్ టాటా తన వ్యక్తిగత జీవితానికి సంబంధించిన విషయాలను తరచూ సోషల్‌మీడియా వేదికగా పంచుకుంటుంటారు. తాజాగా ఆయన టాటా మోటార్స్‌ రూపొందించిన టాటా ఇండికా కారుపై తనకున్న ప్రేమను చాటుతూ ఒక పోస్టు పెట్టారు. ఇండికా కారు పక్కన నిల్చున్నప్పుడు తీసిన ఫొటోను ఇన్‌స్టాగ్రామ్‌లో షేర్‌ చేశారు.
“25 సంవత్సరాల క్రితం, టాటా ఇండికాను ప్రారంభించడం భారతదేశ స్వదేశీ ప్యాసింజర్ కార్ల పరిశ్రమకు పునాది. ఇది మధురమైన జ్ఞాపకాలను నాకు గుర్తుచేస్తుంది. నా హృదయంలో ఈ కారుకు ప్రత్యేక స్థానం ఉంది” అంటూ రాసుకొచ్చారు.