హైదరాబాద్: బల్దియా అధికారులపై పీసీసీ చీఫ్ రేవంత్ రెడ్డి ఫైర్ అయ్యారు. జీహెచ్ ఎంసీ కౌన్సిల్ సమావేశం వర్చువల్‌లో జరగడంపై ఆయన ఆగ్రహం వ్యక్తం చేశారు. లింగోజీగూడ కాంగ్రెస్ కార్పొరేటర్ రాజశేఖర్ రెడ్డి ప్రమాణ స్వీకారానికి ఆయన హాజరయ్యారు. ఈ సందర్బంగా రేవంత్ రెడ్డి మంత్రి, కేటీఆర్, బల్దియా అధికారులపై మండిపడ్డారు.
హైదరాబాద్ నగరం తెలంగాణకు గుండెకాయలాంటిదని రేవంత్ రెడ్డి పేర్కొన్నారు. ఈ హైదరాబాద్ నగరాన్ని పరిశుభ్రంగా ఉంచితేనే ఫలితముంటదని చెప్పారు. అన్ని రకాల ట్యాక్స్ లు పెంచారని ఆందోళన వ్యక్తం చేశారు. రూ. 800 కోట్లతో వరద నివారణ చర్యలు చేస్తామని.. పట్టించుకోలేదని ధ్వజమెత్తారు. నాలాలు, చెరువులు కబ్జా చేసుకున్నాక చర్యలు అంటున్నారని ఎద్దేవా చేశారు. మంత్రి కేటీఆర్, మునిసిపల్ శాఖ ముఖ్య కార్యదర్శి అరవింద్ కుమార్ ఒక మాఫియాగా ఏర్పడ్డారన్నారు.
సీసీ కెమెరాలను నాలాలు, చెరువులు, కబ్జాల ప్రాంతాల్లో పెట్టమని చెప్పామని తెలిపారు. అయినా ప్రభుత్వం పట్టించుకోవడం లేదని ఆవేదన వ్యక్తం చేశారు. మాఫియాకు అనుకూలంగా ఉండేందుకే సీసీ కెమెరాలు ఏర్పాటు చేయటం లేదని పేర్కొన్నారు. త్వరలో మూసీ పరివాహక ప్రాంతాల్లో పర్యటిస్తానని తెలిపారు. తూతూ మంత్రంగా మూసీ అభివృద్ది చర్యలున్నాయని రేవంత్ రెడ్డి వ్యాఖ్యానించారు.
