సార్వభౌమ బంగారం పథకంలో పెట్టుబడుల కోసం 2020–21 సిరీస్‌ను మార్చి 1 నుంచి 5 వరకు ప్రారంభమైంది. పథకం సెటిల్మెంట్‌ మార్చి 9. ఈ పథకంలో పెట్టుబడులు పెట్టాలంటే ఒక గ్రాము బంగారం నుంచి మొదలై గరిష్టంగా 4 కిలోల వరకు వ్యక్తికి, హిందూ అవిభాజ్య కుటుంబాలకు 4 కిలోలు, ట్రస్టులకు 20 కిలోల వరకు వర్తిస్తాయి.
ముఖ్య ఉద్దేశం
ఈ పథకం ముఖ్య ఉద్దేశం.. భౌతిక బంగారం డిమాండును తగ్గించాడం, దేశీయ పొదుపులో కొంత భాగాన్ని బంగారం కొనుగోలుకు బదులుగా, ఆర్థిక పొదుపుగా మార్చడం. ఈ లక్ష్యంతోనే సార్వభౌమ బంగారం పథకాన్ని 2015లో కేంద్ర ప్రభుత్వం ప్రారంభించింది.
సార్వభౌమ బంగారం పథకం ఇష్యూ ధర గ్రాముకు రూ. 4,662 గా నిర్ణయించారు. ఈ పథకాన్ని కేంద్ర ప్రభుత్వం తరఫున ఆర్‌బీఐ జారీ చేస్తోంది. ఆన్‌లైన్‌లో దరఖాస్తు చేసుకునే వారికి గ్రాముకు రూ.50 తగ్గింపు కూడా ఉంది. అంటే ఆన్‌లైన్‌ కొనుగోళ్లు చేసిన వారికి గ్రాముకు రూ.4,612 ఉంటుందని సెంట్రల్‌ బ్యాంకు తెలిపింది.
ఈ ఏడాది 2020–21 సిరీస్‌
ఈ బాండ్‌ పూర్తి కాలం 8 సంవత్సరాలు, 5వ సంవత్సరం నుంచి మీ అవసరాలను బట్టి పథకం నుంచి నిష్క్రమణకు అనుమతి ఉంది. లేదా పూర్తికాలం వరకు కొనసాగవచ్చు. ప్రస్తుతం ఈ సార్వభౌమ బాండ్లను వ్యక్తులు అది కూడా కేవలం భారతీయులకు, ట్రస్టులకు, విశ్వవిద్యాలయాలకు, స్వచ్ఛంద సంస్థలకు మాత్రమే అమ్మడానికే పరిమితం చేశారు.
ఈ సార్వభౌమ బంగారం పథకం బాండ్లను బ్యాంకులు (స్మాల్‌ ఫైనాన్స్‌ బ్యాంకులు, చెల్లింపు బ్యాంకులు మినహా) స్టాక్‌ హోల్డింగ్‌ కార్పొరేషన్‌ ఆఫ్‌ ఇండియా (ఎస్‌హెచ్‌సీఊఎల్‌) ఎంపిక చేసిన పోస్టాఫీసులు, గుర్తింపు పొందిన స్టాక్‌ ఎక్చ్సేంజీలు ద్వారా విక్రయిస్తున్నారు.
