ఈజిప్ట్‌లోని కర్నాక్ దేవాలయం సుమారు 4,000 సంవత్సరాల చరిత్ర కలిగినది. దీని గురించి కొత్త పరిశోధన ఒక అనూహ్య రహస్యాన్ని బయటపెట్టింది. వేలాది సంవత్సరాలుగా నిలబడిన ఈ అద్భుతమైన దేవాలయ సముదాయం కేవలం మానవ నిర్మితమే కాదు, నైలు నది ఆకృతి చేసిన ఒక చిన్న నదీ ద్వీపం నుండి ఉద్భవించిందట. ఈ కొత్త అధ్యయనం ఆలయ చరిత్రను, ప్రాచీన ఈజిప్షియన్ల సృష్టి పురాణానికి దీనికి గల సంబంధాన్ని పూర్తిగా మార్చేసింది. దేవాలయ నిర్మాణం యొక్క పునాదిలో దాగి ఉన్న ఈ ప్రకృతి రహస్యాలను తెలుసుకుందాం.
కర్నాక్ దేవాలయపు రహస్యాలు: ప్రపంచంలోనే అతిపెద్ద మతపరమైన ప్రదేశాలలో ఒకటైన కర్నాక్ దేవాలయం పుట్టుకపై దశాబ్దాలుగా ఉన్న వివాదాలకు తెరదించుతూ, ఇటీవల ప్రచురించబడిన ఒక భూ-పురావస్తు అధ్యయనం (Geoarchaeological Study) కీలక వివరాలను అందించింది. క్రీ.పూ. 2520కి ముందు ఈ ప్రదేశం నైలు నది వేగంగా ప్రవహించే వరద నీటితో నిండి ఉండేది.
అయితే నది మార్గాన్ని మార్చుకోవడంతో, ఇక్కడ నీటిలో మునగని ఒక ఎత్తైన నేల భాగం, నదీ ద్వీపం ఏర్పడింది. ఈ సహజసిద్ధమైన ద్వీపమే దేవాలయ మొదటి నిర్మాణం కోసం గట్టి పునాదిగా మారింది. పాత రాజ్యం కాలానికి చెందిన (క్రీ.పూ. 2300-1980) సిరామిక్ శకలాలు ఇక్కడ దొరకడం ద్వారా ఈ అధ్యయనం ఆలయ తొలి దశ కాలాన్ని నిర్ధారించింది.
సృష్టి పురాణంతో ముడిపడిన పవిత్ర స్థలం: పరిశోధకులు మరింత ఆశ్చర్యకరమైన విషయాన్ని కనుగొన్నారు. కర్నాక్ స్థలం యొక్క ఎంపిక ప్రాచీన ఈజిప్ట్ సృష్టి పురాణాన్ని ప్రతిబింబించేలా ఉంది. ఈ పురాణం ప్రకారం, సృష్టికర్త దేవుడు అమన్‌-రా ‘అల్లకల్లోలమైన నీటి’ నుండి ఉద్భవించిన ‘ఆదిమ మట్టి దిబ్బ’ పై ఆవిర్భవిస్తాడు. నైలు నది ప్రతీ సంవత్సరం పొంగినప్పుడు, ఈ ఆలయం ఉన్న భూభాగం నీటి మధ్య నుండి పైకి తేలుతున్నట్లు కనిపించేది.
థీబ్స్ ప్రాంతంలో నీటితో చుట్టుముట్టబడిన ఏకైక ఎత్తైన ప్రదేశం ఇదే కావడంతో, కర్నాక్‌ను ఈ పవిత్రమైన ప్రదేశంగా ఉద్దేశపూర్వకంగానే ఎంచుకున్నారని పరిశోధకులు భావిస్తున్నారు. అంటే ఈ ఆలయం కేవలం నిర్మాణమే కాదు, అది ప్రాచీన ఈజిప్షియన్ల మత విశ్వాసాలకు ప్రకృతికి మధ్య ఉన్న లోతైన సంబంధానికి చిహ్నం.
కర్నాక్ దేవాలయం చరిత్ర, ప్రకృతి మరియు పురాణాల కలయిక. నైలు నది ప్రవాహం మార్పుల వల్ల ఏర్పడిన ఈ ద్వీపంపైనే వేల సంవత్సరాల పాటు ప్రపంచాన్ని ప్రభావితం చేసిన ఒక గొప్ప కేంద్రం రూపుదిద్దుకుంది.
