ముఖ్యమంత్రి రేవంత్ రెడ్డి అమెరికా పర్యటన బిజీబిజీగా సాగుతోంది. తాజాగా ఆయన కాలిఫోర్నియాలో పర్యటించారు. ఈ సందర్భంగా ఆయన పలు కంపెనీల ప్రతినిధులతో సమావేశమవుతున్నారు. ఈ క్రమంలోనే రాష్ట్రంలో పెట్టుబడులకు అమెరికాలోని పలు కంపెనీలు ముందుకొస్తున్నాయి. హైదరాబాద్లో సుమారు 3 వేల 350 కోట్ల రూపాయల పెట్టుబడులు పెట్టేందుకు ఆరమ్ ఈక్విటీ పార్టనర్స్ ముందుకొచ్చింది. హైదరాబాద్లో నెక్స్ట్-జనరేషన్, అర్టిఫిషియల్ ఇంటెలిజెన్స్- పవర్డ్ గ్రీన్ డేటా సెంటర్ నిర్మించనున్నట్లు తెలిపింది. దశలవారీగా ఈ పెట్టుబడులు పెట్టనున్నట్లు వెల్లడించింది.
ముఖ్యమంత్రి రేవంత్ రెడ్డి, ఐటీ పరిశ్రమల శాఖ మంత్రి శ్రీధర్బాబుతో ఆరమ్ ఈక్విటీ పార్టనర్స్ సంస్థ సీఈవో, ఛైర్మన్ వెంకట్ బుస్సా సమావేశమయ్యారు. ఈ సందర్భంగా తెలంగాణలో తమ విస్తరణ ప్రణాళికలతో పాటు భారీ పెట్టుబడులను కంపెనీ ప్రకటించింది. హైదరాబాద్లో ఏఐ ఆధారిత గ్రీన్ డేటా సెంటర్ ఏర్పాటుకు నిర్ణయం తీసుకోవటం సంతోషకరమని.. దీనివల్ల భారీగా ఉద్యోగాలు లభిస్తాయని ముఖ్యమంత్రి రేవంత్ రెడ్డి తెలిపారు.
