తెలంగాణ బీజేపీ అధ్యక్షుడిగా బండి సంజయ్ పదవి చేపట్టి వచ్చే నెల 11వ తేదీకి మూడేళ్లు పూర్తి కానుంది. ఈ క్రమంలో ఆ పార్టీ రాష్ట్ర వ్యవహారాల ఇంఛార్జ్ తరుణ్ చుగ్ కీలక వ్యాఖ్యలు చేశారు. పార్టీ సంస్థాగత ఎన్నికలు జరిగే వరకు బండి సంజయ్ అధ్యక్షుడిగా కొనసాగుతారని స్పష్టం చేశారు.
పార్టీ సంస్థాగత ఎన్నికలు 2024లో జరుగుతాయని తరుణ్ చుగ్ తెలిపారు. అంత వరకు అధ్యక్షుడిగా బండి సంజయ్ను కొనసాగించాలని జాతీయ నాయకత్వం భావిస్తున్నట్లు స్పష్టం చేశారు. అధికారిక ప్రకటన మార్చి మొదటి వారంలో వెల్లడించే అవకాశం ఉన్నట్లు పార్టీ వర్గాలు వెల్లడించాయి.
తెలంగాణ బీజేపీ అధ్యక్షుడిగా అధికారం చేపట్టిన బండి సంజయ్ కుమార్ మొదటి నుంచి ఆపార్టీ బలోపేతానికి తన వంతు ఎంతో కృషి చేస్తున్నారు. ముఖ్యంగా మహాసంగ్రామ పాదయాత్ర చేస్తూ ప్రజల సమస్యలను గుర్తించారు. ఎక్కడిక్కడ భారీ బహిరంగ సభలు నిర్వహిస్తూ కేసీఆర్ ప్రభుత్వాన్ని లక్ష్యంగా చేసుకొని తీవ్ర విమర్శలు చేసేవారు. రాష్ట్రంలో పార్టీ బలోపేతానికి బండి చేస్తున్న కృషిని పీఎం మోదీ కూడా పలుమార్లు ప్రశంసించారు.
