హైదరాబాద్ వాసులకు ముఖ్యంగా యువతకు బ్యాడ్ న్యూస్. ఇక నుంచి ట్యాంక్ బండ్పై జన్మదిన వేడుకలు జరపకూడదంటూ జీహెచ్ఎంసీ అధికారులు అల్టిమేటమ్ జారీ చేశారు. ట్యాంక్ బండ్పై బర్త్ డే సెలబ్రేషన్స్ను నిషేధిస్తున్నట్లు తెలిపారు. ఇక నుంచి ట్యాంక్ బండ్పై కేక్ కట్ చేయడం, చెత్త చెందారం పారవేయడం చేస్తే జరిమానాలు విధించనున్నట్లు.. ట్యాంక్ బండ్పై జీహెచ్ఎంసీ అధికారులు బ్యానర్లు కట్టారు. నిబంధనలు ఉల్లంఘిస్తే కఠిన చర్యలు తప్పవని హెచ్చరించారు. సీసీటీవీ ద్వారా నిత్యం నిఘా పెట్టనున్నట్లు జీహెచ్ఎంసీ అధికారులు తెలిపారు.
‘రాత్రి నుంచి తెల్లవారుజామున వరకు ట్యాంక్ బండ్ పై.. నగరవాసులు జన్మదిన వేడుకలు జరుపుకుంటున్నారు. ఈ సందర్భంగా.. కేక్ కట్ చేసి నానా హంగామా సృష్టించడమే కాకుండా చెత్త చెదారం అక్కడే వదిలి వెళ్లిపోతున్నారు. ఒక్కొక్కసారి ట్యాంక్ బండ్ పరిసర ప్రాంతాల్లో ట్రాఫిక్ జామ్ చేయడంతో పాటు.. అటుగా వెళ్లే ప్రజలకు ఇబ్బందులు కలిగిస్తున్నారు. ఈ నేపథ్యంలో ఈ నిర్ణయం తీసుకున్నామని’ జీహెచ్ఎంసీ అధికారులు తెలిపారు.
