హైదరాబాద్‌ ఫార్ములా-ఈ రేసింగ్‌ను చూసేందుకు ప్రముఖులు తరలివస్తున్నారు. మాస్టర్‌ బ్లాస్టర్‌ సచిన్ తెందుల్కర్‌, క్రికెటర్లు శిఖర్‌ ధావన్, దీపక్ హుడా, యజ్వేంద్ర చాహల్, ప్రముఖ బ్యాడ్మింటన్ కోచ్‌ పుల్లెల గోపీచంద్, సినీ నటుడు రాంచరణ్‌, రాష్ట్ర ఐటీ శాఖ మంత్రి కేటీఆర్, ఎంపీ సీఎం రమేశ్, ఎంపీ రామ్మోహన్ నాయుడు, గల్లా జయదేవ్.. ఫార్ములా-ఈ రేసింగ్ చూసేందుకు వచ్చారు. తొలిసారి హైదరాబాద్‌లో అంతర్జాతీయ ఫార్మూలా-ఈ రేసింగ్ జరగడం ఎంతో ఆనందం ఉందన్నారు.
ఫార్ములా-ఈ ప్రపంచ ఛాంపియన్‌షిప్‌ నగరంలో మొదలైంది. నెక్లెస్ రోడ్డులో ఏర్పాటు చేసిన రేసింగ్ సర్క్యూట్‌లో ఫార్ములా-ఈ రేసు కార్లు దూసుకుపోతున్నాయి. వివిధ దేశాల నుంచి వచ్చిన రేసర్లు వాయు వేగంతో కార్లలో దూసుకుపోతున్నారు. జాగ్వార్, నిస్సాన్, కప్రా, అవలాంచ్, మహింద్రా కార్లు ట్రాక్ పై దుమ్ము రేపుతున్నాయి.
ప్రస్తుతం క్వాలిఫైయింగ్ రేస్ కొనసాగుతుండగా.. మధ్యాహ్నం 3 గంటలకు ప్రధాన రేస్ ఉంటుంది. మొత్తం 2.8 కిలోమీటర్ల స్ట్రీట్ సర్క్యూట్‌లో 11 ప్రముఖ ఆటోమొబైల్ కంపెనీలకు చెందిన 22 మంది రేసర్లు రేస్‌లో పాల్గొంటున్నారు.
