తెలంగాణ గ్రూప్-4 అభ్యర్థులకు బిగ్ అలర్ట్. గ్రూప్-4 అభ్యర్థులు ఎప్పుడెప్పుడా అని ఎదురుచూస్తున్న గ్రూప్ -4 తుది ఫలితాలు విడుదల చేశామని టీజీపీఎస్సీ సెక్రటరీ నవీన్ నికోలస్ గురువారం ఒక ప్రకటనలో తెలిపారు. 2022 డిసెంబర్ 1వ తేదీన 8,180 పోస్టుల భర్తీకి గ్రూప్ -4 నోటిఫికేషన్ ఇచ్చామని తెలిపారు. మొత్తం 9,51,321 మంది ఈ ఉద్యోగాల కోసం దరఖాస్తు చేసుకున్నారని వెల్లడించారు. 2023 జూలై 1వ తేదీన రాత పరీక్ష నిర్వహించామని, రాత పరీక్షలో ప్రతిభ కనబరిచిన వాళ్లతో ఒక్కో పోస్టుకు ముగ్గురు చొప్పున మెరిట్ జాబితా విడుదల చేశామన్నారు.
సర్టిఫికెట్ల పరిశీలన అనంతరం 8,084 మంది అభ్యర్థులతో కూడిన ప్రొవిజనల్ సెలక్షన్. లిస్ట్ తాజాగా విడుదల చేశామని వెల్లడించారు. అభ్యర్థులు పూర్తి వివరాల కోసం టీజీపీఎస్సీ అధికారిక www.tgpsc.gov.in వెబ్ సైట్ ను సందర్శించాలని ప్రకటించారు. టీజీపీఎస్సీ సెక్రటరీ ప్రకటన ప్రకారం మరో 96 పోస్టులను భర్తీ చేయకుండా పెండింగ్ లో పెట్టినట్లు వెల్లడించారు. మరోవైపు దీనిపై అభ్యర్థులు అన్ని పోస్టులను భర్తీ చేయాలని డిమాండ్ చేస్తున్నారు.
