హైదరాబాద్ మెట్రో ప్రయాణికులకు గుడ్ న్యూస్. ఇంతకుముందు పలు ప్రత్యేక రోజుల్లో మాత్రమే రైలు సేవల వేళలు పొడిగించిన ఈ సంస్థ తాజాగా మరో కీలక నిర్ణయం తీసుకుంది. మెట్రో రైలు సర్వీసులు ప్రయాణికులకు మరింత చేరువయ్యేలా ఈ నిర్ణయం తీసుకున్నట్లు యాజమాన్యం తెలిపింది. ఈ క్రమంలోనే సాధారణంగా రోజూ నడిచే సమయం కంటే.. ఇంకాస్త ఎక్కువ సేపు రైలు సేవలు అందుబాటులో ఉండేలా చర్యలు చేపట్టాయి.
ఈ క్రమంలోనే ఇవాల్టి నుంచి మెట్రో సర్వీసులు అదనపు గంటల్లో పనిచేయనున్నాయి. అందుకు అనుగుణంగా మెట్రో రైలు వేళల్లో అధికారులు స్వల్ప మార్పులు చేశారు. ఇప్పటి వరకు రాత్రి 11 గంటలకు చివరి రైలు ఉండగా, ఇక నుంచి 11.45 గంటలకు టెర్మినల్ స్టేషన్ నుంచి అందుబాటులో ఉండనున్నట్లు మెట్రో అధికారులు తెలిపారు. మరోవైపు ప్రతి సోమవారం ఉదయం 5.30 గంటలకే మెట్రో రాకపోకలు ప్రారంభం కానున్నాయి. మిగిలిన రోజుల్లో సాధారణంగానే ఉదయం 6 గంటల నుంచే మెట్రో పరుగులు పెట్టనుంది. రోజురోజుకు మెట్రోలో రద్దీ పెరుగుతున్న దృష్ట్యా ప్రయాణికుల సౌకర్యార్థం మెట్రో ప్రయాణ వేళల్లో మార్పులు చేసినట్లు సమాచారం.
