పెద్దల సాక్షిగా.. ఒకే మండపంలో ఇద్దరమ్మాయిలతో యువకుడి పెళ్లి

ఒక వ్యక్తి రెండు పెళ్లిళ్లు చేసుకోవడం సహజం. కానీ ఒకేసారి రెండు వివాహాలు.. అదేనండి ఒకేసారి ఇద్దరిని పెళ్లి చేసుకోవడం మాత్రం కాస్త డిఫరెంటుగా అనిపిస్తోంది కదూ. ఇదెలా సాధ్యం అని అనుకుంటున్నారా.. కానీ ఓ యువకుడు ఒకే మండపంలో ఒకే సమయంలో ఇద్దరు అమ్మాయిలను పెళ్లాడాడు. అది కూడా పెద్దల సాక్షిగా.. బంధువుల సమక్షంలో. ఈ సంఘటన కుమురంభీం ఆసిఫాబాద్ జిల్లాలో చోటుచేసుకుంది.

అసలేం జరిగిందంటే..

జిల్లాలోని లింగాపూర్ మండలం గుమ్మూర్ గ్రామంలో లాల్ దేవి, జల్కర్ దేవి అనే ఇద్దరు అమ్మాయిలు ఉన్నారు. సూర్యదేవ్ అనే యువకుడు ఈ ఇద్దరు అమ్మాయిలను ప్రేమించాడు. అయితే అతడు వారిలో ఏ ఒక్కరిని వదులుకోవడానికి ఇష్టపడలేదు. ఆ యువతులు కూడా అతడే కావాలని పట్టుబడ్డారు. చేసేదేం లేక ముగ్గురూ కలిసి జీవించాలనే నిర్ణయానికి వచ్చారు. మొదట ఈ నిర్ణయం విన్న వారి కుటుంబ సభ్యులు షాక్ అయ్యారు. కానీ వారు పట్టిన పట్టు వదలకపోవడంతో ముగ్గురికి ఒకే మండపంలో పెళ్లి చేశారు.