తెలంగాణ లోక్సభ ఎన్నికల పోలింగ్ ప్రశాంతంగా సాగుతోంది. పలువురు ప్రముఖులతో పాటు ఓటర్లు పెద్ద ఎత్తున పోలింగ్ కేంద్రాలకు చేరుకుంటున్నారు. వాతావరణం కాస్త చల్లబడటంతో మధ్యాహ్నం కావొస్తున్నా ఓటర్లు తరలి వస్తున్నారు. ఇప్పటికే పలువురు రాజకీయ ప్రముఖులు, సినీ సెలబ్రిటీలు ఓటు హక్కు వినియోగించుకున్నారు. మరోవైపు ప్రభుత్వ అధికారులు కూడా ఓటేశారు. ఈ నేపథ్యంలో తాజాగా తెలంగాణ సీఎస్‌ శాంతికుమారి ఓటు హక్కు వినియోగించుకున్నారు. ప్రశాసన్‌నగర్‌లో శాంతికుమారి ఓటు వేశారు. అనంతరం మాట్లాడుతూ రాష్ట్ర ప్రజలంతా తప్పని సరిగా ఓటు వేయాలని పిలుపునిచ్చారు. పోలింగ్ కేంద్రాల్లో వసతులు సౌకర్యంగా ఉన్నాయని చెప్పారు.
శాంతికుమారితో పాటు ఎన్నికల ముఖ్య అధికారి వికాస్ రాజ్, డీజీపీ రవి గుప్తా తమ కుటుంబ సభ్యులతో కలిసి ఓటు హక్కు వినియోగించుకున్నారు. వీరే కాకుండా రాష్ట్ర వ్యాప్తంగా జిల్లా కలెక్టర్లు, ఇతర ఐఏఎస్, ఐపీఎస్ అధికారులు విధిగా ఓటు హక్కు వినియోగించుకుని ప్రజలంతా ఓటేయడానికి తరలి రావాలని పిలుపునిస్తున్నారు.
