సంగారెడ్డి జిల్లాలో ఘోర రోడ్డు ప్రమాదం చోటుచేసుకుంది. కంది మండలం తునికిళ్ల తండా శివారులో లారీని వెనుక నుంచి బైక్ ఢీకొట్టింది. ఈ ప్రమాదంలో ముగ్గురు యువకులు అక్కడికక్కడే దుర్మరణం చెందారు. నాందేడ్‌ నుంచి హైదరాబాద్‌కు వెళ్తున్న లారీని వెనుక నుంచి ద్విచక్రవాహనం ఢీకొట్టడంతో ఈ ఘటన చోటుచేసుకుంది. సమాచారం అందుకున్న పోలీసులు ఘటనాస్థలికి చేరుకున్నారు. మృతదేహాలను స్థానిక ప్రభుత్వాస్పత్రికి తరలించారు. మృతుల వివరాల కోసం ఆరా తీస్తున్నారు. ఈ ఘటనపై కేసు నమోదు చేసుకున్న పోలీసులు దర్యాప్తు చేస్తున్నారు.
పోలీసులు తెలిపిన వివరాల ప్రకారం.. ‘ఇవాళ తెల్లవారుజామున ముగ్గురు యువకులు ఒకే బైక్పై వెళ్తున్నారు. తునికిళ్ల తండా శివారులోకి రాగానే లారీని వెనక నుంచి ఢీకొట్టారు. ఈ ఘటనలో ముగ్గురు స్పాట్ డెడ్ అయ్యారు. లారీ యజమాని ఆచూకీ కోసం చూస్తున్నాం. ఘటనాస్థలిలో సీసీటీవీ కెమెరాలు ఏవైనా ఉన్నాయో చెక్ చేస్తున్నాం. మృతుల వివరాలు ఇంకా తెలియరాలేదు. కేసు నమోదు చేసుకుని దర్యాప్తు చేస్తున్నాం.’ అని పోలీసులు తెలిపారు.
