దీపావళికి సందడి చేయబోయే సినిమాలివే.. పండగ పందెంలో విజేత ఎవరో?

దీపావళి పండగ ఈ నెల 24 అయినప్పటికీ బాక్సాఫీస్​కు మాత్రం మూడు రోజులు ముందే 21న రానుంది. చాలా సినిమాలు బాక్సాఫీస్ వద్ద సందడి చేయబోతున్నాయి. విశ్వక్ సేన్ హీరోగా విక్టరీ వెంకటేష్ టైటిల్ రోల్​లో స్పెషల్ క్యామియో చేసిన ఓరి దేవుడా చెప్పుకోదగ్గ అంచనాలతో రిలీజవుతోంది. ఆల్రెడీ తమిళ్​లో సూపర్​ హిట్​ కొట్​ కొట్టి రీమేక్ అవుతున్న కంటెంట్ అయినప్పటికీ అంతగా హైప్ లేదు కానీ వెంకీ ఎంట్రీ ఇచ్చాక ఆడియన్స్​లో ఆసక్తి పెరిగింది. మరి బాక్స్ ఆఫీస్ వద్ద ఎలాంటి విజయం సాధిస్తుందో వేచి చూడాల్సింది.

దీపావళి కానుకగా రాబోతున్న మరో సినిమా ప్రిన్స్‌. శివ కార్తికేయన్‌,మారియా హీరోహీరోయిన్లుగా నటించిన ఈ సినిమాకు జాతిరత్నాలు ఫేమ్ అనుదీప్ కెవి దర్శకత్వం వహించారు. తెలుగు, తమిళ రెండు భాషలలోనూ ఈ సినిమా ఈనెల 21న విడుదల కాబోతుంది.ఇందులో శివకార్తికేయన్ స్కూల్ టీచర్‌గా నటించారు. నటుడు ఇందులో సత్యరాజ్ కీలక పాత్రలో కనిపించనున్నారు. ఇప్పటికే ఈ సినిమాపై మాంచి బజ్‌ క్రియేట్‌ అయ్యింది. దీనికి తోడు ప్రిన్స్‌ కోసం హీరో విజయ్‌ దేవరకొండ సైతం రంగంలోకి దిగి ప్రమోషన్స్‌ చేశారు. మరి ఈ సినిమా తెలుగు ప్రేక్షకులను ఎంతవరకు మెప్పిస్తుందన్నది చూడాల్సి ఉంది.

ఇక మరో తమిళ హీరో కార్తి కూడా ఈసారి దీపావళి బరిలోకి దిగుతున్నారు. కార్తీ తండ్రీ కొడుకులుగా ద్విపాత్రాభినయం చేసిన చిత్రం సర్దార్‌. పీఎస్ మిత్రాన్ దర్శకత్వం వహించిన ఈ చిత్రం తమిళంతో పాటు తెలుగులోనూ రిలీజ్ కానుంది. రాశిఖన్నా,రజీషా విజయన్‌ ఇందులో హీరోయిన్స్‌గా నటించారు. నటి లైలా ఇందులో కీలక పాత్రలో నటించారు. ఈ సినిమాలో దాదాపు 15 గెటప్పుల్లో కార్తి కనిపించనున్నట్లు తెలుస్తోంది. జీవీ ప్రకాశ్‌కుమార్‌ సంగీతాన్ని అందించిన ఈ చిత్రం దీపావళి సందర్భంగా ఈనెల 21న తెరపైకి రానుంది. ఇప్పటికే కార్తికి తెలుగులోనూ మంచి డిమాండ్‌ ఉంది. మరి ఈ సినిమాతో కార్తికి ఇంకో హిట్టు పడినట్లేనా అన్నది చూద్దాం.

ఇక మంచు విష్ణు జిన్నా ఏదో సర్ప్రైజ్ ఇచ్చి బాగుందనే టాక్ తెచ్చుకుంటే తప్ప నిలదొక్కుకోవడం కష్టం. కానీ హాలీవుడ్ మూవీ బ్లాక్ ఆడమ్​కు అనూహ్యంగా మల్టీ ప్లెక్స్ బుకింగ్స్ జోరుగా ఉన్నాయి. యూత్, పిల్లలు దీని మీదే ఎక్కువ ఆసక్తి చూపిస్తున్నారు. ఒకవేళ అవెంజర్స్, స్పైడర్ మ్యాన్ రేంజ్ టాక్ వస్తే పోటీ మాత్రం జోరుగా ఉంటుంది. ఇక కాంతార గురించి తెలిసిందే. రెండో వారంలోనూ ఎక్కువ స్క్రీన్లలో కొనసాగించబోతున్నారు.

ఇక 25న బాలీవుడ్ నుంచి రెండు చిత్రాలు రాబోతున్నాయి. అక్షయ్ కుమార్ రామ్ సేతుని భారీ ఎత్తున రిలీజ్ చేస్తున్నారు. సత్యదేవ్​కు ఇందులో చాలా ప్రాధాన్యం ఉన్న పాత్ర దక్కింది. అజయ్ దేవగన్ సిద్దార్థ్ మల్హోత్రాల థాంక్ గాడ్ అదే రోజు బరిలో దిగనుంది. ఈ క్లాష్ ఆసక్తికరంగానే ఉన్నప్పటికీ అడ్వాన్స్ బుకింగ్స్ మాత్రం ఆశించిన స్థాయిలో లేవట. ఆ మాటకొస్తే మన సినిమాలకూ ట్రెండ్ అంత పాజిటివ్ గా లేదు. ఆన్ లైన్లో ముందస్తుగా టికెట్లన్నీ అమ్ముడుపోయే రేంజ్​లో దేని మీదా ఆ స్థాయి హైప్ లేదు. ఈ పండగలో విన్నర్ ఎవరో తేలాలంటే ఓ వారం ఆగాల్సిందే