దళపతి విజయ్‌కు కోలీవుడ్‌లో భారీ మార్కెట్ ఉంది. తెలుగులో కాస్త తక్కువగా ఉంటుంది. అయితే దిల్ రాజు, వంశీ పైడిపల్లి ఇద్దరూ కూడా తమిళ మార్కెట్‌ను దృష్టిలో పెట్టుకునే ఈ సినిమాను తీసినట్టుగా చెబుతున్నారు. ఇది పక్కా తమిళ సినిమా అని, విజయ్ సినిమా అని చెబుతూనే వచ్చారు. అయితే.. ఈ సినిమా, తమిళ … తెలుగు భాషల్లో ఈ నెల 12వ తేదీన ప్రేక్షకుల ముందుకు రానుంది. ఈ నేపథ్యంలో కొంతసేపటి క్రితం ఈ సినిమా తెలుగు వెర్షన్ నుంచి ట్రైలర్ ను రిలీజ్ చేశారు.
ఈ సినిమాలో హీరో ఉమ్మడి కుటుంబానికి చెందినవాడు. ఆ కుటుంబం పాలిట విలన్ గా తయారవుతాడు ప్రకాశ్ రాజ్. అతన్ని ఎదిరించి తన కుటుంబాన్ని హీరో ఎలా కాపాడుకున్నాడనేదే కథ అనే విషయం ఈ ట్రైలర్ వలన అర్థమవుతోంది. విజయ్ సరసన నాయికగా రష్మిక సందడి చేయనున్న ఈ సినిమాలో, శరత్ కుమార్ .. సుమన్ .. ప్రకాశ్ రాజ్ .. ప్రభు .. శ్యామ్ .. జయసుధ .. ఖుష్బూ ముఖ్యమైన పాత్రలను పోషించారు. తమన్ నుంచి వచ్చిన పాటల్లో రంజితమే సాంగ్ బాగా అయిన సంగతి తెలిసిందే.
