ఎండలు ముదురుతున్న వేళ పెద్దలకే కాదు, పిల్లలకూ నీరు చాలా అవసరం. ఆటపాటల్లో పడి పిల్లలు అసలు దాహం వేస్తున్నా పట్టించుకోరు. దీనివల్ల వారి శరీరం త్వరగా డీహైడ్రేషన్కు గురయ్యే ప్రమాదం ఉంది. అయితే ఏ వయసు పిల్లలు ఎంత నీరు తాగాలి? మార్కెట్లో దొరికే జ్యూస్లు ఇవ్వొచ్చా? ఇంట్లోనే తయారు చేసే పానీయాల వల్ల కలిగే లాభాలేంటి? వంటి ఆసక్తికర విషయాలు తల్లిదండ్రుల కోసం ఇక్కడ ఉన్నాయి.
ఏ వయసు పిల్లలు ఎంత తాగాలి?: పిల్లల శరీరానికి నీటి అవసరం అనేది వారి వయసు, వారు ఆడే ఆటలు మరియు వాతావరణంపై ఆధారపడి ఉంటుంది. సాధారణంగా ఒకటి నుంచి నాలుగేళ్ల లోపు పిల్లలు రోజుకు కనీసం 1 లీటరు నీళ్లు తాగాలి. ఐదు నుంచి తొమ్మిదేళ్ల లోపు వారు 1.5 లీటర్లు, తొమ్మిది నుంచి పద్నాలుగేళ్ల లోపు వారు 2 లీటర్ల నీటిని తీసుకోవాలి. వేసవిలో చెమట ఎక్కువగా పడుతుంది కాబట్టి ఆటలు ఆడే సమయంలో పిల్లలకు దప్పిక వేస్తే మరికొంత ఎక్కువ నీరు తాగించడం మంచిది.
బయటి జ్యూస్లు.. లోపల డేంజర్: చాలామంది పిల్లలు నీళ్లు తాగడానికి మారాం చేస్తారని తల్లిదండ్రులు మార్కెట్లో దొరికే ఫ్రూట్ జ్యూస్లు కొనిస్తుంటారు. అవి వంద శాతం సహజమని నమ్ముతారు కానీ, వాటిలో రంగులు, నిల్వ ఉండటానికి వాడే కెమికల్స్, అధికంగా చక్కెర ఉంటాయి. ఇక వీటివల్ల దంత సమస్యలు, చిన్న వయసులోనే ఊబకాయం (Obesity) వచ్చే ప్రమాదం ఉంది. ముఖ్యంగా సోడా వంటి కార్బొనేటెడ్ డ్రింక్స్ అసలు ఇవ్వకూడదు. వీటిలో ఉండే కెఫిన్ వల్ల దాహం తగ్గకపోగా ఇంకా పెరుగుతుంది.
ఇంట్లోనే ఆరోగ్యాన్ని అందించండి: బయటి పానీయాల కంటే ఇంట్లోనే తాజాగా చేసే జ్యూస్లు పిల్లలకు ఎంతో శక్తినిస్తాయి. పుచ్చకాయ, ఖర్బూజ, స్ట్రాబెర్రీ, నారింజ వంటి పండ్లను ముక్కలుగా కోసి ఇవ్వడం లేదా రసం తీసి ఇవ్వడం వల్ల నీటితో పాటు ఖనిజ లవణాలు కూడా అందుతాయి. ఇక 9 నుంచి 13 ఏళ్ల పిల్లలకు 180 మి.లీ, అంతకంటే పెద్దవారికి 250 మి.లీ వరకు ఇంట్లో చేసిన జ్యూస్ ఇవ్వొచ్చు. దీనివల్ల పిల్లలకు తక్షణ శక్తి లభిస్తుంది మరియు శరీరం చల్లబడుతుంది.
పిల్లలు ఆడుకునే ఉత్సాహంలో నీళ్లు తాగడం మర్చిపోతుంటారు. అందుకే పెద్దలే చొరవ తీసుకుని ప్రతి అరగంటకు లేదా గంటకు ఒకసారి నీళ్లు తాగిస్తూ ఉండాలి. పిల్లల ఎదుగుదలలో నీరు ప్రాణవాయువు లాంటిదని గుర్తించి, వారిని ఎప్పుడూ హైడ్రేటెడ్గా ఉంచడం మన బాధ్యత.
గమనిక: ఎండ ఎక్కువగా ఉన్నప్పుడు పిల్లలను బయట తిరగనివ్వకుండా చూసుకోండి. నీరు లేదా జ్యూస్లతో పాటు మజ్జిగ, కొబ్బరి నీళ్లు ఇవ్వడం వల్ల ఎండ దెబ్బ నుంచి వారిని కాపాడుకోవచ్చు.
