ఏలూరు: వైసీపీ ఖాతాలోకి ఏలూరు కార్పొరేషన్ చేరింది. కార్పొరేషన్ ఎన్నికలు జరిగిన విషయం తెలిసిందే. ఈ ఎన్నికలకు సంబంధించి ఆదివారం ఓట్ల లెక్కింపు ప్రక్రియ సాగుతోంది. మొత్తం 50 డివిజన్లలో ఇప్పటికే వైసీపీ 28 డివిజన్లలో విజయం సాధించింది. మిగిలిన కార్పొరేషన్లలో కూడా ఓట్ల లెక్కింపు సాగుతోంది. ఈ డివిజన్లలో కూడా వైసీపీ ముందంజలో ఉన్నట్లు సమాచారం. పలుచోట్ల టీడీపీ అభ్యర్థులు గెలుపొందారు. జనసేన అభ్యర్థులు కూడా ఖాతా తెరిచారు.
ఇక ఓట్ల లెక్కింపు సందర్భంగా సీఆర్ రెడ్డి ఇంజినీరింగ్ కాలేజీ సమీపంలో ఆంక్షలు కొనసాగుతున్నాయి. కాలేజీకి 100 మీటర్ల దూరంలోనే వాహనాలకు అనుమతించారు. అధికారులు అనుమతి ఉంటేనే అభ్యర్థులను ఇతరులను కాలేజీలోకి అనుమతిస్తున్నారు. ఈ సందర్భంగా కాలేజీ సమీపంలో భద్రత కట్టుదిట్టం చేశారు. పోలీసులు భారీగా మోహరించారు. ఎటువంటి అవాంఛనీయ ఘటనలు చోటు చేసుకోకుండా అన్ని ఏర్పాట్లు చేశారు. కోవిడ్ నిబంధనలు తప్పనిసరి చేశారు.
