ఐకూ నుంచి 10 సిరీస్‌ ఫోన్లను లాంచ్ చేసేందుకు కంపెనీ రెడీ అయింది. ఐకూ 10, ఐకూ 10 ప్రో స్మార్ట్ ఫోన్లను వచ్చే నెలలో లాంచ్ కానున్నాయి. ఈ ఫోన్లకు సంబంధించి కొంత సమాచారం ఇప్పటికే లీక్‌ అయింది. డిజిటల్ చాట్ స్టేషన్ అనే ఐడీ ఉన్న ప్రముఖ టిప్‌స్టర్ తెలిపిన వివరాలు ఇలా ఉన్నాయి..
క్వాల్‌కాం స్నాప్‌డ్రాగన్ 8 జెన్ 2 ప్రాసెసర్‌తో ఈ ఫోన్లు లాంచ్ అయ్యే అవకాశం ఉందట.. క్వాల్‌కాం స్నాప్‌డ్రాగన్ 8 జెన్ 1 ప్రాసెసర్‌తో ఎంట్రీ ఇచ్చిన మొదటి ఫోన్లలో ఐకూ 9 ప్రో ఒకటి. జనవరిలోనే ఈ ఫోన్ మార్కెట్లో అడుగుపెట్టింది.ఐకూ 10 సిరీస్‌లో ఎస్ఈ మోడల్ ఉంటుందో లేదో ఇంకా తెలియరాలేదు.
ఐకూ 9 సిరీస్‌లో ఈ ఎస్ఈ మోడల్‌ను అందించారు. కానీ ఈ ఐకూ 9 ఎస్ఈ కేవలం మనదేశంలో మాత్రమే లాంచ్ అయింది. ఐకూ 10 గురించి ఇప్పటివరకు ఎలాంటి వివరాలు తెలియరాలేదు.
అయితే ఐకూ 10 ప్రో గురించి కొన్ని వివరాలు లీకయ్యాయి. దాని ప్రకారం ఈ ఫోన్‌లో 2కే అమోఎల్ఈడీ ఎల్టీపీవో డిస్‌ప్లేను అందించనున్నారు. 120 హెర్ట్జ్ వరకు రిఫ్రెష్ రేట్ ఇందులో ఉండనుంది. దీని బ్యాటరీ సామర్థ్యం 4700 ఎంఏహెచ్‌గా ఉండనుందట.
మనదేశంలో ఐకూ నియో 6 5జీ స్మార్ట్ ఫోన్ ఇటీవలే లాంచ్ అయింది. ఈ ఫోన్ ధర రూ.29,999 నుంచి ప్రారంభం కానుంది. ఇది 8 జీబీ ర్యామ్ + 128 జీబీ స్టోరేజ్ వేరియంట్ ధర. 8 జీబీ ర్యామ్ + 256 జీబీ స్టోరేజ్ వేరియంట్ ధర రూ.33,999గా నిర్ణయించారు. క్వాల్‌కాం స్నాప్‌డ్రాగన్ 870 5జీ ప్రాసెసర్‌పై ఈ ఫోన్ పనిచేయనుంది. 80W ఫ్లాష్ చార్జ్‌ను ఈ ఫోన్ సపోర్ట్ చేయనుంది. 6.62 అంగుళాల అమోఎల్ఈడీ డిస్‌ప్లే, ట్రిపుల్ కెమెరా సెటప్, 4700 ఎంఏహెచ్ బ్యాటరీ వంటి ఫీచర్లు కూడా ఈ స్మార్ట్ ఫోన్‌లో అందించారు.
ఇంకా ఐకూ 10 సిరీస్‌ ధరలను కంపెనీ చెప్పలేదు. ముందు విడుదలైన వర్షన్స్‌ బట్టి.. వీటి ధర కూడా దాదాపు అదే రేంజ్‌లో ఉంటుందని అంచనా..!
