వెబ్ బ్రౌజర్లో లాగిన్ అవ్వకుండా ట్విటర్ ఖాతాలను వినియోగించే వారికి ఆ సంస్థ షాక్ ఇచ్చింది. ఇక నుంచి ట్విటర్ ఖాతాలు వినియోగించాలంటే కచ్చితంగా లాగిన్ అవ్వాల్సిందేనని స్పష్టం చేసింది. ఆ దిశగా మస్క్ కొత్త టీమ్ చర్యలు చేపట్టి.. కొత్త రూల్ను తీసుకువచ్చింది. ట్విటర్ ఖాతా లేని వారు కచ్చితంగా ఓ నయా ఖాతాను తెరవాల్సిందేనంటూ అసలు విషయం చెప్పుకొచ్చింది. ‘విపరీతమైన డేటా స్క్రాపింగ్’ కారణంగా ఇటువంటి అత్యవసర చర్యను తీసుకున్నట్లు ఎలాన్ మస్క్ ఓ ప్రకటనలో పేర్కొన్నారు. మరోవైపు ఇది తాత్కాలిక చర్య అని స్పష్టం చేశారు.
అంకుర సంస్థల నుంచి అగ్రస్థాయి కంపెనీల వరకు ఆర్టిఫీషియల్ ఇంటెలిజెన్స్ను ఉపయోగించే ప్రతీ సంస్థ.. ఖాతాల్లోని డేటాను ఉచితంగా తీసుకుంటున్నాయని మస్క్ అన్నారు. దీని వల్ల సాధారణ యూజర్ డేటా దోపిడీకి గురవుతోందని తెలిపారు. ఏఐ ద్వారా జరిగే అనవసరమైన సెర్చింగ్ను అరికట్టేందుకు తీసుకుంటున్న ఈ నిర్ణయం వల్ల బయటి లింక్స్, ఎంబేడెడ్స్ ద్వారా ట్విటర్ ఖాతాల్లోని డేటాకు ఎటువంటి హాని కలగదని.. తమ వద్దనున్న డేటా సురక్షితంగా ఉంటుందని ట్విటర్ సంస్థ వెల్లడించింది.
