బాలీవుడ్‌లో మరో విషాదం నెలకొంది. యంగ్ హీరో సుశాంత్ మరణం నుంచి కోలుకోక ముందే ఇంకొందరు నటుల మరణ వార్తలు వినాల్సివస్తుండటం జీర్ణించుకోలేక పోతున్నారు ప్రేక్షకులు. తాజాగా బాలీవుడ్‌లో ‘హై అప్పా దిల్ తోహ్ అవారా’ చిత్రంలో నటించిన ప్రముఖ మోడల్, నటి దివ్య చౌక్సే కేన్సర్‌తో నిన్న అర్ధరాత్రి తుది శ్వాస విడిచింది. దివ్యచౌక్సే మృతిని ఆమె బంధువు అమిష్ వర్మ ధృవీకరించారు. దివ్య మృతిపై పలువురు నటులు తమ సంతాపం తెలియజేసారు.
కాగా తన మరణానికి కొన్ని గంటల ముందు దివ్య చౌక్సే హృదయ విదారక పోస్టు పెట్టడం కన్నీళ్లు పెట్టిస్తోంది. ‘‘కేన్సరుతో నేను నెలల తరబడిగా మరణ మంచం మీద ఉన్నాను. బాధ లేని మరొక జీవితంలో కలుద్దాం. దివ్య చౌక్సే బై ’’ అంటూ ఈ పోస్టులో ఆమె పేర్కొంది. ఇప్పటికే ఇర్ఫాన్ ఖాన్, రిషీ కపూర్ వంటి నటుల మరణాలు బాలీవుడ్‌ను శోక సంద్రంలో ముంచెత్తాయి. అలాగే ఆదివారం నాడు నటుడు రంజన్ సెహగల్ మరణవార్తతో బాలీవుడ్ లోకంలో విషాదఛాయలు అలుముకున్న సంగతి తెలిసిందే.
