కొందరు కొందరు.. క్షణికావేశంలో ఏం చేస్తారో వారికే తెలియదు.. కొన్ని కొన్ని సార్లు ఆలోచించకుండా తీసుకునే నిర్ణయాలతో ఆర్థిక నష్టంతో పాటు.. లేనిపోని తలనొప్పులు వచ్చి పడుతుంటాయి.. అలాంటి ఘటనే ఇది.. ప్రేమించి పెండ్లి చేసుకొన్న భార్య కాపురానికి రావట్లేదని ఓ యువకుడు సొంత కారుకే నిప్పంటించాడు. ఈ ఘటన పెద్దపల్లి జిల్లా అందుగుల శివారు లో ఆదివారం చోటు చేసుకుంది. పోలీసులు తెలిపిన వివరాల ప్రకారం.. హైదరాబాద్‌కు చెంది న అనూషను బసంత్‌నగర్‌కు చెందిన అర్జున్ సామిల్‌పాల్‌ ఏడాది క్రితం ప్రేమ వివాహం చేసుకొన్నాడు.
కొంతకాలం వీరి కాపురం అన్యోన్యంగా సాగింది. అయితే ఇటీవల భార్య భర్తల మధ్య మనస్పర్థలు తలెత్తగా అనూష పుట్టింటికి వెళ్లిపోయింది. ఈ నేపథ్యంలో భార్య కాపురానికి వస్తదో రాదోననే మనోవేదనతో కొంతకాలంగా అర్జున్ బాధపడుతున్నాడు. ఈ క్రమంలో ఆదివారం అందుగులపల్లి శివారు పెద్దమ్మ ఆలయ సమీపంలో రోడ్డు పక్కన తన స్కార్పియోకు నిప్పు పెట్టాడు. స్థానికులు పోలీసులకు సమాచారం ఇవ్వడంతో ఫైర్‌ సిబ్బందితో అక్కడికి చేరుకొని మంటలను ఆర్పివేశారు. పోలీసులు కేసు నమోదు చేసి దర్యాప్తు చేస్తున్నారు.
