బ్రిటన్‌ రాజకుటుంబ చరిత్రలో మరో అరుదైన ఘటన చోటుచేసుకుంది. గత 130 ఏళ్లలో తొలిసారిగా ఈ రాజకుటుంబానికి చెందిన ఓ వ్యక్తి మంగళవారం రోజున కోర్టుకు హాజరయ్యారు. ఫోన్‌ హ్యాకింగుకు సంబంధించిన కేసులో ‘మిర్రర్‌’ వార్తాసంస్థకు వ్యతిరేకంగా కింగ్‌ ఛార్లెస్‌-3 రెండో తనయుడు ప్రిన్స్ హ్యారీ (38) సాక్ష్యం చెప్పారు.
బ్రిటన్‌కు చెందిన ‘మిర్రర్‌’ గ్రూప్‌ న్యూస్‌పేపర్స్‌ (ఎంజీఎన్‌) అనేకమంది ప్రముఖుల వ్యక్తిగత విషయాలను సేకరించేందుకుగాను చట్ట వ్యతిరేక కార్యకలాపాలకు పాల్పడిందనే ఆరోపణలు వచ్చాయి. ఈ ఫోన్‌ హ్యాకింగ్‌ ఆరోపణలకు సంబంధించి ప్రిన్స్ హ్యారీతోపాటు వంద మందికి పైగా ప్రముఖులు కోర్టులో దావా వేశారు. దీనిపై లండన్‌ హైకోర్టు విచారణ చేపట్టగా.. ఈ కేసులో సాక్ష్యం చెప్పేందుకు హ్యారీ న్యాయస్థానం ఎదుట హాజరయ్యారు. భార్య మేఘన్‌ మర్కెల్‌, పిల్లలతో కలిసి అమెరికాలో ఉంటున్న ప్రిన్స్ హ్యారీ సోమవారం లండన్‌కు చేరుకొని, మరుసటిరోజు హైకోర్టుకు వచ్చారు. బైబిల్‌పై ప్రమాణం చేశాక తన వాదన వినిపించారు.
