సికింద్రాబాద్ మహంకాళి బోనాల ఉత్సవాలు అంగరంగ వైభవంగా కొనసాగుతున్నాయి. ఆదివారం తెల్లవారుజాము నుంచి అమ్మవారి ఆలయానికి భక్తులు పోటెత్తుతున్నారు. రాష్ట్ర నలుమూలల నుంచి బోనాల పండుగకు భక్తులు తరలివచ్చారు. ఆదివారం అర్ధరాత్రి దాటిన తర్వాత కూడా అమ్మవారిని దర్శించుకున్నారు. ఎంతో ఉత్సాహంగా సాగుతున్న బోనాల ఉత్సవాల్లో ఆదివారం రాత్రి అపశ్రుతి చోటుచేసుకుంది.
మహంకాళి అమ్మవారిని దర్శించుకునేందుకు వచ్చిన ఓ భక్తుడు ఆదివారం రాత్రి విద్యుదాఘాతంతో మృతి చెందాడు. అమ్మవారికి మొక్కులు చెల్లించుకునే క్రమంలో విద్యుత్ స్తంభం తగిలి కరెంట్ షాక్ రావడంతో మరణించాడు. గమనించిన తోటి భక్తులు కాపాడేందుకు ప్రయత్నించినా ఫలితం లేకపోయింది. వెంటనే యువకుడి మృతదేహాన్ని పోలీసులు గాంధీ ఆస్పత్రికి తరలించారు. అమ్మవారి దర్శనానికి వచ్చిన బేగంబజార్‌ వాసి ఆకాష్‌ సింగ్‌ మృతి చెందినట్లు పోలీసులు తెలిపారు. భక్తుడి మరణంతో కాసేపటి వరకు అమ్మవారి ప్రాంగణంలో అలజడి నెలకొంది. అనంతరం పోలీసుల చొరవతో తిరిగి యథావిథిగా భక్తులు అమ్మవారికి మొక్కులు సమర్పించుకున్నారు.
