ఓటమి భయంతోనే సీఎం జగన్ ఫ్యాక్షన్ రాజకీయాలు చేస్తున్నారని ఆరోపించారు టిడిపి నేత, మాజీమంత్రి కన్నా లక్ష్మీనారాయణ. శనివారం సత్తుపల్లిలో ఆయన మీడియాతో మాట్లాడుతూ.. చంద్రబాబు సభలకు, లోకేష్ పాదయాత్రకు ప్రజాదరణ పెరిగిందని తెలిపారు. ఆ కారణంగానే చంద్రబాబు పర్యటనలో వైసిపి గుండాలు దాడికి పాల్పడ్డారని ఆరోపించారు.
పోలీసులు ప్రజాస్వామ్యాన్ని కాపాడాలని కోరారు కన్నా లక్ష్మీనారాయణ. ఇక ఈ నెల 9న సత్తెనపల్లి నియోజకవర్గంలో టిడిపి జాతీయ ప్రధాన కార్యదర్శి నారా లోకేష్ పాదయాత్ర చేపట్టనున్నట్లు తెలిపారు. ఎవరెన్ని అడ్డంకులు సృష్టించినా, దాడులు చేసినా రాబోయే ఎన్నికలలో తెలుగుదేశం పార్టీ అధికారంలోకి రాబోతుందని ధీమా వ్యక్తం చేశారు.
