తెలంగాణ సీఎం కేసీఆర్ సతీమణి శోభ తిరుమల శ్రీవారిని దర్శించుకున్నారు. ఇవాళ తెల్లవారుజామున ఆమె సుప్రభాత సేవలో పాల్గొన్నారు. అనంతరం తిరుమల శ్రీవారి అర్చన సేవలో పాల్గొని స్వామివారి ఆశీస్సులు తీసుకున్నారు. ఓవైపు కేసీఆర్కు వైరల్ ఫీవర్ రావడం.. మరోవైపు ఎన్నికల షెడ్యూల్ విడుదల కావడంతో ఆమె శ్రీవారిని దర్శించుకున్నట్లు తెలిసింది. కేసీఆర్ త్వరగా పూర్తిగా కోలుకోవాలని తిరుమలేశుడిని కోరుకున్నట్లు సమాచారం.
మరోవైపు గత వారం రోజులుగా సీఎం కేసీఆర్ వైరల్ ఫీవర్, బ్యాక్టీరియల్ ఇన్ఫెక్షన్తో బాధపడుతున్న విషయం తెలిసిందే. ఈ విషయాన్ని ఇటీవలే కేటీఆర్ వెల్లడించారు. అయితే ఆయన త్వరగా కోలుకుంటున్నారని మంత్రి కేటీఆర్ తాజాగా చెప్పారు. మరో రెండ్రోజుల్లో సింహం ఎన్నికల ప్రచారంలో దిగుతుందని తెలిపారు. ఈ నేపథ్యంలో రాష్ట్రంలో ప్రకటించిన ఎన్నికల షెడ్యూల్లో పోలింగ్ నవంబర్ 30, ఫలితాలు డిసెంబర్ 3వ తేదీ.. రెండిట్లోనూ 3 ఉందని.. కేసీఆర్ మూడోసారి అధికారంలోకి రావడం ఖాయమనే సంకేతాలను ఇస్తోందని కేటీఆర్ అన్నారు.
