తెలంగాణ అసెంబ్లీ ఎన్నికల సందర్భంగా కేంద్ర ఎన్నికల సంఘం తాజాగా మరికొన్ని మార్గదర్శకాలు జారీ చేసింది. రాష్ట్రంలోని అన్ని పోలింగ్‌ కేంద్రాల్లో మాక్‌ పోలింగ్‌ నిర్వహించాలని సీఈసీ ఆదేశాలు జారీ చేసింది. అనంతరం ఆ ఓట్లను తొలగించాలని సూచించింది. మాక్‌ పోలింగ్‌తో సాధారణ పోలింగు నిర్వహణ జాప్యం అవుతోందన్న ఫిర్యాదుల నేపథ్యంలో గంటన్నర ముందుగా నిర్వహించాలని పేర్కొంది.
మాక్‌ పోలింగ్‌ ప్రక్రియలో భాగంగా ప్రతి పోలింగ్‌ కేంద్రంలో కనీసం 50 ఓట్లు వేయాలని.. ఏ అభ్యర్థికి ఎన్నెన్ని ఓట్లు వేశారన్నది నమోదు చేయాలని మార్గదర్శకాల్లో తెలిపింది. అప్పటికప్పుడే ఓట్ల లెక్కింపు, వీవీప్యాట్‌లోని స్లిప్పుల లెక్కింపూ జరిగిపోవాలని.. అన్నీ సరిపోయాయా? లేదా? అని నిర్ధరించుకోవాలని చెప్పింది. ఒకవేళ వ్యత్యాసం ఉన్నట్లు గుర్తించిన పక్షంలో ఆ యంత్రాన్ని తొలగించి మరో యంత్రంతో మాక్‌ పోలింగ్‌ నిర్వహించాలని పేర్కొంది. మాక్‌ పోలింగ్‌లో వేసిన ఓట్లను విధిగా తొలగించాలని, పోలింగ్‌ ఏజెంట్లకు వాటిని చూపించాలని కేంద్ర ఎన్నికల సంఘం స్పష్టం చేసింది.
