రంగారెడ్డి జిల్లా రాజేంద్రనగర్‌లో భారీ అగ్నిప్రమాదం చోటుచేసుకుంది. రాజేంద్రనగర్‌ సన్‌సిటీ వద్ద క్రాకర్స్ దుకాణంలో మంటలు చెలరేగాయి. పక్కనే ఉన్న దుర్గా భవాని ఫుడ్ జోన్‌కు మంటలు వ్యాపించడంతో అందులో ఉన్న గ్యాస్ సిలిండర్ పేలింది. ఈ క్రమంలో మంటలు వ్యాపించి పక్కనే ఉన్న మరో మూడు దుకాణాలు అగ్నికి ఆహుతయ్యాయి. ఒక్కసారిగా భారీ శబ్ధం రావడంతో గాఢ నిద్రలో ఉన్న స్థానికులు ఉలిక్కిపడ్డారు. మొత్తం 4 దుకాణాల నుంచి పెద్ద ఎత్తున మంటలు ఎగిసిపడుతున్నాయి.
సమాచారం అందుకున్న పోలీసులు, అగ్నిమాపక సిబ్బంది ఘటనాస్థలికి చేరుకున్నారు. సహాయక చర్యలను మొదలుపెట్టారు. 4 ఫైరింజన్లతో సిబ్బంది మంటలు ఆర్పుతున్నారు. మంటలు మరిన్ని దుకాణాలకు వ్యాపించకుండా ఫైర్‌ సిబ్బంది ప్రయత్నిస్తున్నారు. గోడలు బద్దలు కొట్టి మంటలు ఆర్పుతున్నారు. రాత్రి వేళ దుకాణాల్లో ఎవరూ లేకపోవడంతో ప్రాణ నష్టం తప్పిందని అధికారులు తెలిపారు. ప్రమాదానికి గల కారణాలపై దర్యాప్తు చేస్తామని చెప్పారు. ఈ ఘటనపై కేసు నమోదు చేసుకున్నట్లు పోలీసులు వెల్లడించారు.
