ప్రస్తుతం ట్రెండ్ అంతా ఓటీటీలదే. అందుకే అగ్రనేతల నుంచి స్టార్ నటుల వరకు అంతా డిజిటల్ మీడియాలోనూ తమ సత్తా చాటేందుకు ప్రయత్నిస్తున్నారు. ఓవైపు వెండితెరపై ఓ వెలుగు వెలుగుతూనే మరోవైపు ఓటీటీల్లో ప్రేక్షకులను అలరిస్తున్నారు. అలా సీనియర్ నటుల నుంచి యంగ్ నటుల వరకు అందరూ ఓటీటీ అవకాశాలను సద్వినియోగం చేసుకుంటున్నారు. అలా నటి ప్రియమణి కూడా డిజిటల్ బాట పట్టింది. ఫ్యామిలీమ్యాన్ వంటి సిరీస్తో ప్రేక్షకులను ఫిదా చేసింది.
ఇక తెలుగులో ఈ బ్యూటీ నటించిన ‘భామా కలాపం’ ఓటీటీ వేదికగా విడుదలై ఆదరణ దక్కించుకున్న సంగతి తెలిసిందే. ఇప్పుడీ మూవీకి కొనసాగింపుగా ‘భామా కలాపం 2’ రెడీ అవుతోంది. అభిమన్యు తాడిమేటి తెరకెక్కిస్తున్న ఈ మూవీలో సీరత్‌ కపూర్‌, రఘు ముఖర్జీ, బ్రహ్మాజీ తదితరులు కీలక పాత్రలు పోషిస్తున్నారు. బాపినీడు, సుధీర్‌ ఈదర సంయుక్తంగా నిర్మిస్తున్న ఈ మూవీ ఈసారి ఓటీటీలో కాకుండా థియేటర్లో సందడి చేయనుందట. ఈ విషయాన్ని తాజాగా చిత్ర బృందం ప్రకటించింది. ఈ మేరకు గురువారం ఫస్ట్‌లుక్‌ పోస్టర్‌ను విడుదల చేసి. ‘‘తొలి భాగాన్ని మించిన థ్రిల్లింగ్‌ ఎలిమెంట్స్‌తో ఈ రెండో భాగం రూపొందుతోంది. అన్ని రకాల ఎమోషన్స్‌తో ఇదొక మంచి విందులా ఉంటుంది’’ అని క్యాప్షన్ రాసుకొచ్చింది.
