సాధారణంగా ఉన్నత చదువులు చదివే వారికి అనేక స్కాలర్ షిప్పులు అందుకునే అవకాశం ఉంటుంది. ప్రభుత్వ, ప్రైవేటు సంస్థలు ఈ ఉపకార వేతనాలు అందిస్తాయి. అయితే కళాకారులకు కూడా స్కాలర్ షిప్పులు అందుకునే అవకాశం ఉందని మీకు తెలుసా..?
భారత ప్రభుత్వ సాంస్కృతిక మంత్రిత్వ శాఖకు చెందిన సెంటర్‌ ఫర్‌ కల్చరల్‌ రిసోర్సెస్‌ అండ్‌ ట్రైనింగ్‌ .. సీసీఆర్‌టీ.. ఈ స్కాలర్ షిప్పులు అందిస్తుంది. 2019-20 సంవత్సరానికి పలు కళల్లో ప్రావీణ్యమున్న యువ కళాకారులకు ఉపకారవేతనాలు అందించేందుకు ప్రకటన కూడా వెలువరించింది.
సంప్రదాయ సంగీతం, సంప్రదాయ నృత్యం, నాటకం, మైమ్‌, చిత్ర కళ, జానపదం, లైట్‌ క్లాసికల్‌ మ్యూజిక్‌ వంటి విభాగాల్లో ఈ స్కాలర్ షిప్పులు అందిస్తారు. దీనికింద నెలకు రూ.5 వేలు ఆర్థిక సహాయం అందుతుంది. ఈ స్కాలర్ షిప్ అందుకోవాలంటే కొన్ని అర్హతలు ఉండాలి సుమా. సంబంధిత కళలో డిప్లొమా లేదా డిగ్రీ ఉత్తీర్ణులై ఉండాలి. అందుకు సంబంధించిన శిక్షణా సర్టిఫికెట్‌ ఉండాలి.
ఈ ఏడాది మొత్తం 400 మందికి ఈ స్కాలర్ షిప్ అందిస్తారు. అర్హులను ఎంపిక చేసేందుకు ఇంటర్యూ నిర్వహిస్తారు. ఈ ఇంటర్వ్యూలో అభ్యర్థిని తమ కళలను ప్రదర్శించమని అడగవచ్చు. దీనికి ధరఖాస్తు చేసేందుకు ఆఖరు తేదీ డిసెంబర్ 5.. ఆన్ లైన్ ద్వారా దరఖాస్తు చేసుకోవాల్సి ఉంటుంది. మరిన్ని వివరాల కోసం ccrtindia.gov.in వెబ్ సైట్ పరిశీలించవచ్చు.
