గ‌త ఏడాది సంక్రాంతి కానుకగా విడుదలైన నాలుగు చిత్రాల్లో ‘ఎఫ్ 2’ సినిమా సత్తా చాటింది. భారీ వసూళ్లతో కాసుల వర్షం కురిపించింది. వెంకటేష్, వరుణ్ తేజ్ హీరోలుగా అనిల్ రావిపూడి తెరకెక్కించిన ఈ ఫ్యామిలీ ఎంటర్‌టైనర్‌లో తమన్నా, మెహ్రీన్ లు హీరోయిన్లుగా నటించారు. అయితే ఈ చిత్రం సూప‌ర్ డూప‌ర్ హిట్ అవ్వ‌డంతో.. ‘ఎఫ్ 3’ సీక్వెల్ తీయబోతున్నట్టు ప్రకటించాడు. అది కూడా దిల్ రాజు బ్యానర్ లోనే ఉంటుందని ఇప్పటికే స్పష్టం చేశాడు. అంతేకాదు ఈ సీక్వెల్ కోసం ముందుగా మాస్‌రాజా రవితేజను అనుకున్నారు. అయితే తాజా సమాచారం ప్ర‌కారం ఎఫ్ 3 సీక్వెల్‌లో మహేష్ బాబు యాక్ట్ చేయబోతున్నట్టు సమాచారం. ఈ యేడాది సంక్రాంతికి అనిల్ రావిపూడి దర్శకత్వంలో తెరకెక్కిన ‘సరిలేరు నీకెవ్వరు’ సినిమాతో మహేష్ బాబుకు మంచి హిట్ అందించాడు.
దీంతో అనిల్ రావిపూడితో మరో సినిమా చేయబోతున్నట్టు ప్రకటించాడు. ఇక ఈ సినిమాతో మహేష్ బాబుతో అనిల్ రావిపూడికి మంచి సాన్నిహిత్యం ఏర్పడింది. ఆ అనుబంధం రీత్యా ఎఫ్ 3 సీక్వెల్‌లో యాక్ట్ చేస్తే బాగుంటుందని సూచించాడట. దీంతో మహేష్ బాబు గ్రీన్ సిగ్నెల్ ఇవ్వ‌డ‌మే కాకుండా 13రోజుల కాల్షీట్ కూడా ఇచ్చేశారట. ఇప్పటికే ఎఫ్2 చిత్రం తో వరుణ్, వెంకటేష్ లకి మంచి పేరు దక్కింది. ఇపుడు ఈ హీరోలతో మహేష్ నటించడం టాలీవుడ్ లో ఆస‌క్తిక‌రంగా మారింది. అంతేకాకుండా, వెంకీ, వరుణ్ సరసన హీరోయిన్లుగా తమన్నా, మెహ్రీన్ కంటిన్యూ అవ్వనుండగా.. మహేష్ సరసన రష్మిక కనిపించబోతున్నట్లు టాక్. మరి ఇందులో నిజమెంతో తెలియాలంటే కొన్ని రోజులు ఆగాల్సిందే.
