మహాభారతంలో కురుక్షేత్ర యుద్ధం జరుగుతున్నప్పుడు, కౌరవ సైన్యాధిపతి భీష్ముడిని ఓడించడం పాండవులకు అసాధ్యంగా మారింది. యుద్ధంలో భీష్ముడిని ఓడించాలంటే, అతని పతనానికి కారణం కావాల్సిన వ్యక్తిని పట్టుకోవాలని శ్రీకృష్ణుడు తెలుపుతాడు. ఆ వ్యక్తి శిఖండి. శిఖండి పేరు వినగానే భీష్ముడు తన ఆయుధాలు కింద పెడతాడు. దాని వెనుక ఉన్న రహస్యం ఏమిటి? శిఖండి అసలు ఎవరు? ఎలా భీష్ముడి చావుకు కారణం అయింది అనే ఆసక్తికరమైన విషయాలను తెలుసుకుందాం.
శిఖండి పూర్వ జన్మ, పగ: శిఖండి పూర్వజన్మలో కాశీ రాజు కుమార్తె అయిన అంబ. స్వయంవరంలో ఆమె శాల్వ రాజును ఇష్టపడినా, భీష్ముడు అంబను, ఆమె ఇద్దరు సోదరీమణులను (అంబిక, అంబాలిక) తన సోదరుడు విచిత్రవీర్యుడికి భార్యలుగా తీసుకొని వెళ్లాడు. కానీ అంబ మనసులో శాల్వ రాజు ఉండటం తెలుసుకున్న భీష్ముడు ఆమెను తిరిగి శాల్వ రాజు దగ్గరికి పంపించాడు. అప్పటికే అంబను భీష్ముడు అపహరించాడు కాబట్టి శాల్వ రాజు ఆమెను తిరస్కరించాడు.
ఇటు శాల్వ రాజు తిరస్కరణకు గురైన అంబ, అటు భీష్ముడు తనను వివాహం చేసుకోనని చెప్పడంతో తీవ్ర అవమానానికి గురైంది. తన జీవితం నాశనమవడానికి భీష్ముడే కారణమని నమ్మింది. ఎలాగైనా భీష్ముడిని చంపాలని శివయ్యకు తపస్సు చేసి, అతని చావుకు కారణమయ్యే శక్తిని పొందింది. ఆ శక్తితోనే శిఖండిగా జన్మించింది.
కురుక్షేత్ర యుద్ధంలో భీష్ముడి పతనం: యుద్ధంలో భీష్ముడిని ఎదుర్కోవడానికి పాండవులు చాలా ప్రయత్నించారు. అప్పుడు శ్రీకృష్ణుడు భీష్ముడిని చంపడానికి శిఖండిని ఒక ఆయుధంగా ఉపయోగించమని అర్జునుడికి చెప్పాడు. తన గత జన్మలో అంబగా ఉన్నప్పుడు భీష్ముడు తనను అవమానించినందువల్ల, శిఖండికి భీష్ముడికి మధ్య వైరం ఉంది. అప్పుడు అతను శిఖండిని ఒక స్త్రీగా భావించి ఆమెను యుద్ధంలో ఎదుర్కోలేనని, ఆమె ఎదురైతే తన ఆయుధాలను కింద పెట్టేస్తానని ప్రతిజ్ఞ చేశాడు.
కురుక్షేత్ర యుద్ధంలో, భీష్ముడు యుద్ధం చేస్తూ ఉన్నప్పుడు, అర్జునుడు తన రథం వెనుక శిఖండిని ఉంచి, శిఖండిని భీష్ముడిని ఎదుర్కోమని కోరాడు. శిఖండిని చూసిన భీష్ముడు తన ప్రతిజ్ఞ ప్రకారం తన ఆయుధాలను కింద పెట్టేశాడు. ఆ సమయంలో అర్జునుడు భీష్ముడిపై బాణాలతో దాడి చేసి, అతడిని బాణాల పడకపై పడేలా చేశాడు. ఈ విధంగా శిఖండి, తన ప్రతిజ్ఞ ప్రకారం భీష్ముడి పతనానికి కారణమైంది.
గమనిక: ఈ ఆర్టికల్ మహాభారతంలోని కథ ఆధారంగా రూపొందించబడింది. వేర్వేరు ప్రాంతాలలో మరియు సంప్రదాయాలలో కథలో కొన్ని చిన్న మార్పులు ఉండవచ్చు.
