సోయాబీన్స్ ఆడవారి ఆరోగ్యానికి చాలా మంచివి.. ముఖ్యంగా పిరియడ్స్‌ సమస్య ఉన్నవారికి ఇది చాలా మంచిదంటారు. సోయాబీన్స్‌ను ఉపయోగించి చేసే ఉత్పత్తి సోయా చంక్స్. వీటిని సోయా మీల్ మేకర్ అంటారు. వీటిని అనేక రకాల వంటకాల్లో ఉపయోగిస్తున్నారు. ముఖ్యంగా దీన్ని శాఖాహార మాంసంగా పిలుస్తారు. దీనిని బిర్యానీలో వేసుకోవడమే కాదు కూరలు, ఫ్రైలు కూడా చేసుకుంటారు. రుచి కూడా బాగుంటుంది.. సోయా గ్రాన్యూల్స్, సోయా నగ్గెట్స్, సోయా చంక్స్ ఇలా రకరకాల ఆకారాల్లో దొరుకుతాయి.
సోయాబీన్స్ నుంచి నూనెను తయారు చేసేటప్పుడు మిగిలే పిండితో వీటిని తయారు చేస్తారు. అయితే వీటిని తినాలా వద్దా అనే విషయంలో కొన్ని వాదనలు ఉన్నాయి.. సోయా చంక్స్‌ను తినడం వల్ల క్యాన్సర్ వచ్చే అవకాశం ఉందని కొందరు భావిస్తూ ఉంటే, మరికొందరు హార్మోన్ అసమతుల్యతకు ఇవి కారణం అవుతాయని భావిస్తున్నారు.. వీటిలో ఎంతవరకు నిజమో పోషకాహార నిపుణులు ఏం అంటున్నారో చూద్దామా..!.
సోయా ప్రోటీన్‌కు అద్భుత మూలం. 100 గ్రాముల సోయా మీల్ మేకర్‌ను తింటే 52 మిల్లీగ్రాముల ప్రోటీన్ లభిస్తుంది. 100 గ్రాముల సోయా మిల్ మేకర్ ద్వారా 21 మిల్లీ గ్రాముల ఇనుము శరీరానికి అందుతుంది. అలాగే 10 గ్రాముల ఫైబర్ కూడా అందుతుంది. అందుకే శాఖాహారులు ఖచ్చితంగా తినాల్సిన ఆహారాల్లో సోయా కూడా ఉంటుంది.. ముఖ్యంగా ప్రోటీన్ లోపం రాకుండా చేయడంలో ఇది ముందుంటుంది. అంతేకాదు వీటిలో కొవ్వు తక్కువగా ఉంటుంది. క్యాల్షియం, మెగ్నీషియం పుష్కలంగా లభిస్తాయి.
మగవారు వీటిని నిజంగానే తినకూడదా..?
చాలామంది మగవారిలో సోయా మీల్ మేకర్‌ను తినడం సురక్షితం కాదని భావన ఉంది. దీనికి కారణం సోయాబీన్స్‌లో ఫైటో ఈస్ట్రోజన్ అని పిలిచే వివిధ రకాల మొక్కల సమ్మేళనాలు ఉంటాయి. ఇవి ఈస్ట్రోజన్ హార్మోన్‌కు సమానమైన నిర్మాణాన్ని కలిగి ఉంటాయి. ఈస్ట్రోజన్ అనేది స్త్రీ హార్మోన్. సోయా అధికంగా తినడం వల్ల మగవారి శరీరంలో ఈస్ట్రోజన్ హార్మోన్ స్థాయిలు పెరుగుతాయని, దీనివల్ల హార్మోన్ల అసమతుల్యత ఏర్పడవచ్చు అనే భావన ఉంది.. అయితే ఇది శాస్త్రీయంగా ఇంతవరకు నిరూపణ జరగలేదు, కాబట్టి ఇది నిజమో కాదో చెప్పే అవకాశం లేదు.
మితంగా తీసుకుంటే…
ఏ ఆహారాన్ని అయినా మితంగా తీసుకుంటే ఎలాంటి సమస్యా ఉండదు. అలాగే సోయా మీల్ మేకర్‌ను కూడా మితంగా తీసుకుంటే శరీరానికి ఆరోగ్యమే తప్ప అనారోగ్యం ఉండదు. వండే ముందు ఈ సోయా మీల్ మేకర్ లేదా చంక్స్‌ను నీళ్ళల్లో నానబెట్టి చాలాసార్లు పిండాలి. ఆ తర్వాత ఉడికించాలి. ఇలా చేయడం వల్ల వాటిలో ఉండే కాంప్లెక్స్ కార్బోహైడ్రేట్లు విచ్ఛిన్నమవుతాయి. కాబట్టి వీటిని తిన్నా కూడా సులభంగా జీర్ణం అవుతాయి.
