శరీరానికి గుండె పంప్ చేసే రక్తం దాని ద్వారా సరఫరా అయ్యే ఆక్సిజన్ చాలా ముఖ్యం. ఈ రక్తాన్ని సరఫరా చేసే రక్తనాళాలు అడ్డంకులు ఏర్పడితే అది మన ఆరోగ్యానికి పెద్ద ముప్పు. సాధారణంగా ఈ అడ్డంకులను ముందుగానే పసిగట్టడం కష్టం. కానీ మన శరీరం కొన్ని హెచ్చరికలను ఇస్తుంది. మనం వాటిని జాగ్రత్తగా గమనిస్తే పెద్ద ప్రమాదాలను నివారించవచ్చు. ఈ లక్షణాలు ముందుగానే తెలుసుకోవడం ద్వారా సరైన జాగ్రత్తలు తీసుకోవడానికి వీలు కలుగుతుంది.
రక్తనాళాల అడ్డంకులకు సంకేతాలు: ఛాతీ నొప్పి, ఇది రక్తనాళాల అడ్డంకులకు ప్రధానమైన సూచన. గుండెకు రక్తం సరిగా అందనప్పుడు ఛాతీ మధ్యలో లేదా ఎడమవైపున నొప్పి ఒత్తిడి లేదా భారంగా అనిపిస్తుంది. ఈ నొప్పి భుజాలకు మెడకు లేదా దవడకు కూడా వ్యాపించవచ్చు. విశ్రాంతి తీసుకున్నప్పుడు ఇది తగ్గిపోవచ్చు.
శ్వాస ఆడకపోవడం: గుండెకు సరిపడా రక్తం అందనప్పుడు, గుండె రక్తాన్ని సమర్థవంతంగా పంప్ చేయలేదు. దీనివల్ల శ్వాస తీసుకోవడంలో ఇబ్బంది లేదా ఆయాసం వస్తుంది. ముఖ్యంగా శారీరక శ్రమ చేసేటప్పుడు ఈ సమస్య ఎక్కువగా కనిపిస్తుంది.
కాళ్లలో నొప్పి లేదా తిమ్మిరి: కాళ్లకు రక్తం సరఫరా చేసే నాళాలు మూసుకుపోతే, నడిచేటప్పుడు లేదా వ్యాయామం చేసేటప్పుడు కాళ్లలో నొప్పి, తిమ్మిరి లేదా అలసట వస్తుంది. దీనిని పెరిఫెరల్ ఆర్టరీ డిసీజ్ (PAD) అని అంటారు. విశ్రాంతి తీసుకున్నప్పుడు ఈ నొప్పి తగ్గుతుంది.
అలసట, బలహీనత: గుండెకు, ఇతర శరీర భాగాలకు ఆక్సిజన్ తక్కువగా అందడం వల్ల శరీరం త్వరగా అలసిపోతుంది బలహీనంగా అనిపిస్తుంది. రోజువారీ పనులు చేయడానికి కూడా శక్తి ఉండదు.
చెమట పట్టడం, వికారం: కారణం లేకుండా విపరీతంగా చెమట పట్టడం, వికారం వాంతులు లేదా తలతిరగడం వంటి లక్షణాలు గుండె సంబంధిత సమస్యలకు సంకేతాలు కావచ్చు.
ఈ లక్షణాలు కనిపించినంత మాత్రాన రక్తనాళాలు బ్లాక్ అయ్యాయని కచ్చితంగా చెప్పలేం. కానీ వీటిని నిర్లక్ష్యం చేయకుండా వైద్యుడిని సంప్రదించడం చాలా ముఖ్యం. జీవనశైలిలో మార్పులు సరైన ఆహారం క్రమం తప్పకుండా వ్యాయామం చేయడం ద్వారా రక్తనాళాల సమస్యలను నివారించవచ్చు. మీ శరీరం ఇచ్చే సూచనలను అర్థం చేసుకుని ఆరోగ్యం పట్ల శ్రద్ధ వహించడం ద్వారా గుండె సంబంధిత సమస్యలను నివారించవచ్చు.
గమనిక: పైన ఇచ్చిన సమాచారం కేవలం అవగాహన కోసం మాత్రమే, ఆరోగ్య సమస్యల గురించి ఖచ్చితమైన నిర్ధారణ కోసం వైద్య నిపుణులను సంప్రదించడం తప్పనిసరి.
