పూర్వ కలం లో డాక్టర్లు లేదా పెద్దవాళ్ళు చాలా మంది విరేచనాలతో బాధపడుతున్నప్పుడు “కాస్త గంజి లేదా అన్నం ఉడికిన నీరు తాగండి, శక్తి వస్తుంది” అని సలహా ఇస్తారు. అయితే ‘రైస్ వాటర్ డయారియా’ అనేది దీనికి పూర్తిగా విరుద్ధంగా ఉంటుంది. ఇది నీళ్ల విరేచనాల యొక్క ఒక ప్రత్యేకమైన, ప్రమాదకరమైన లక్షణం. వినడానికి వింతగా ఉన్నా, ఇది కొన్ని తీవ్రమైన ఆరోగ్య సమస్యల వలన వస్తుంది. ముఖ్యంగా పిల్లలు మరియు బలహీనంగా ఉన్నవారికి ఈ పరిస్థితి ప్రాణాంతకం కావచ్చు. అసలు ఈ రైస్ వాటర్ డయారియా అంటే ఏమిటి? దానిని ఎలా గుర్తించాలి? ఎలాంటి జాగ్రత్తలు తీసుకోవాలి తెలుసుకుందాం.
రైస్ వాటర్ డయారియా అంటే ఏమిటి: రైస్ వాటర్ డయారియా అనేది ఒక వైద్య పదం. ఇది కలరా వంటి తీవ్రమైన బ్యాక్టీరియా సంక్రమణ కారణంగా వచ్చే విరేచనాలను సూచిస్తుంది.
ప్రమాదం: ఈ రకమైన డయారియాలో శరీరం నుండి అధిక మొత్తంలో ద్రవాలు మరియు ఎలక్ట్రోలైట్‌లు సోడియం, పొటాషియం వంటివి చాలా వేగంగా బయటకు పోతాయి. ఇది కేవలం కొన్ని గంటల్లోనే తీవ్రమైన నిర్జలీకరణానికి దారితీయవచ్చు, ఇది చికిత్స చేయకపోతే ప్రాణాంతకం కావచ్చు.
రైస్ వాటర్ డయారియా లక్షణాలు: సాధారణ విరేచనాల కంటే రైస్ వాటర్ డయారియాను గుర్తించడానికి కింది లక్షణాలను గమనించాలి. విరేచనాలు గంజిలాగా, తెల్లగా, ద్రవ రూపంలో మరియు వాసన లేకుండా ఉంటాయి. సాధారణంగా ఇవి అతి వేగంగా మొదలవుతాయి మరియు తరచుగా వస్తూ ఉంటాయి (రోజుకు 10 నుండి 30 సార్లు కూడా). అతి తక్కువ సమయంలోనే తీవ్రమైన నిర్జలీకరణ లక్షణాలు కనిపిస్తాయి. తీవ్రమైన దప్పిక, నోరు, చర్మం పొడిబారడం. కళ్లు లోపలికి పోయినట్లు కనిపించడం, చాలా తక్కువ మూత్ర విసర్జన, చాతి నొప్పి, పిల్లలో కనిపిస్తుంది. తరచుగా విరేచనాలతో పాటు విపరీతమైన వాంతులు కూడా ఉంటాయి.
ఇతర విరేచనాల మాదిరిగా కాకుండా కలరా వల్ల వచ్చే రైస్ వాటర్ డయారియాలో సాధారణంగా కడుపు నొప్పి లేదా జ్వరం ఉండకపోవచ్చు. అందుకే దీని తీవ్రతను తక్కువగా అంచనా వేయకూడదు.
రైస్ వాటర్ డయారియా అనేది అత్యవసర వైద్య పరిస్థితి. ఈ లక్షణాలు గమనించిన వెంటనే, నిర్జలీకరణాన్ని నివారించడానికి OR S (ఓరల్ రీహైడ్రేషన్ సొల్యూషన్) ఇవ్వడం చాలా ముఖ్యం. ముఖ్యంగా పిల్లలు లేదా వృద్ధులలో ఈ లక్షణాలు కనిపిస్తే తక్షణమే వైద్య సహాయం తీసుకోవడం అత్యవసరం. నివారణే ఉత్తమమైన మార్గం, పరిశుభ్రమైన ఆహారం, నీరు తాగడం ద్వారా కలరా వంటి సంక్రమణను నివారించవచ్చు.
గమనిక: పైన ఇచ్చిన సమాచారం కేవలం అవగాహన కోసం మాత్రమే,మీరు లేదా మీ కుటుంబ సభ్యులలో ఎవరైనా ఈ “రైస్ వాటర్” వంటి విరేచనాల లక్షణాలను గమనించినట్లయితే, వెంటనే వైద్యుడిని సంప్రదించండి.
