పిల్లల ఆరోగ్యం కోసం దగ్గు మందు కాకుండా ఏం చేయాలో తెలుసుకోండి.

శీతాకాలం వచ్చిందంటే చాలు, పిల్లల్లో దగ్గు సాధారణంగా కనిపిస్తుంది. అయితే దగ్గు తగ్గడానికి వెంటనే దగ్గు మందులు (Cough Syrups) వాడటం సరైన మార్గం కాదు. తాజాగా మహారాష్ట్ర లో జరిగిన దగ్గుమందు సంఘటన ఎంతో మందిని ఆలోచింపచేసింది. ముఖ్యంగా చిన్న పిల్లలకు కొన్ని రకాల మందులు దుష్ప్రభావాలను కలిగించవచ్చు. మీ చిన్నారుల ఆరోగ్యం కోసం, దగ్గు నుంచి ఉపశమనం పొందడానికి మందుల కన్నా మెరుగైన, సురక్షితమైన సహజసిద్ధమైన పద్ధతులు చాలా ఉన్నాయి. ఈ సాధారణ చిట్కాలను పాటించడం ద్వారా మీ పిల్లలు త్వరగా కోలుకోవచ్చు. మందులు లేకుండానే దగ్గును ఎలా ఎదుర్కోవాలో ఇప్పుడు తెలుసుకుందాం.

పిల్లల్లో దగ్గు అనేది వైరస్ లేదా చిన్నపాటి అలెర్జీల వల్ల వస్తుంది. దీనిని ఎదుర్కోవడానికి మందుల వాడకాన్ని తగ్గించి, సురక్షితమైన ఈ 5 పద్ధతులను ప్రయత్నించండి:

తేమ (Humidity) పెంచండి. పిల్లలు పడుకునే గదిలో హ్యూమిడిఫైయర్ (Humidifier) లేదా ఆవిరి పట్టడం (Steam) ద్వారా గాలిలో తేమను పెంచడం వలన దగ్గు తగ్గుతుంది. గదిలో తేమ ఎక్కువగా ఉంటే, శ్వాసనాళాల్లోని గట్టిగా ఉన్న కఫం కరిగి సులభంగా బయటకు వస్తుంది. గోరువెచ్చని నీటితో ఆవిరి పట్టించడం వల్ల ముక్కు దిబ్బడ కూడా తగ్గుతుంది.

ద్రవపదార్థాలు పుష్కలంగా ఇవ్వండి. దగ్గు ఉన్నప్పుడు వెచ్చని ద్రవపదార్థాలు ఎక్కువగా ఇవ్వడం చాలా ముఖ్యం. నీరు, పలచటి రసం లేదా నిమ్మరసం వంటివి ఇవ్వడం వలన శరీరంలో డీహైడ్రేషన్ జరగకుండా ఉంటుంది. అలాగే గొంతులోని శ్లేష్మం పలచబడి సులభంగా బయటకు వస్తుంది. పాలు జ్యూస్‌ల కన్నా నీరు మంచిది.

తేనెను ఉపయోగించండి (ఒక సంవత్సరం పైబడిన పిల్లలకు) ఒక సంవత్సరం పైబడిన పిల్లలకు, రాత్రి పడుకునే ముందు ఒక టీస్పూన్ తేనె ఇవ్వడం దగ్గు తగ్గడానికి చాలా ప్రభావవంతంగా పనిచేస్తుంది. తేనె గొంతులో పూతలా ఏర్పడి ఉపశమనాన్ని ఇస్తుంది. అయితే ఒక సంవత్సరం లోపు పిల్లలకు తేనె ఇవ్వకూడదు.

తల పైకి ఉండేలా పడుకోబెట్టండి పిల్లలు పడుకునేటప్పుడు, వారి తల కాస్త పైకి ఉండేలా రెండు దిండ్లు (Pillows) పెట్టి పడుకోబెట్టండి. తల ఎత్తుగా ఉంటే, శ్లేష్మం ముక్కు నుంచి గొంతులోకి ప్రవహించడం తగ్గి, రాత్రిపూట వచ్చే దగ్గు తగ్గుతుంది.

వెచ్చటి ఉప్పు నీటితో పుక్కిలించడం (పెద్ద పిల్లలకు) మాట బాగా వచ్చే పెద్ద పిల్లలు గోరువెచ్చటి ఉప్పు నీటితో పుక్కిలిస్తే (Gargle), గొంతు వాపు, గొంతునొప్పి మరియు దగ్గు నుంచి తక్షణ ఉపశమనం లభిస్తుంది. ఉప్పు నీరు గొంతులోని ఇన్ఫెక్షన్‌ను తగ్గించడంలో సహాయపడుతుంది.

పిల్లల్లో దగ్గు అనేది వారి శరీరం ఇన్ఫెక్షన్‌తో పోరాడుతోందని చెప్పడానికి ఒక సంకేతం మాత్రమే. అందుకే వెంటనే మందుల వైపు చూడకుండా ఈ సహజసిద్ధమైన, సురక్షితమైన పద్ధతులను పాటించడం వల్ల వారికి హాయిగా నిద్ర పడుతుంది మరియు త్వరగా కోలుకుంటారు. సహనం మరియు సరైన సంరక్షణతో మీరు మీ పిల్లలకు దగ్గు నుంచి ఉపశమనాన్ని అందించవచ్చు.

గమనిక: దగ్గు 3 రోజులకు మించి ఉన్నా, జ్వరం అధికంగా ఉన్నా, లేదా పిల్లలు శ్వాస తీసుకోవడానికి కష్టపడుతున్నా వెంటనే వైద్యుడిని సంప్రదించాలి.