ఒక్కోసారి మనసు బాగోకపోవడం సహజమే. కానీ ఆ నిరాశ ఆ నిస్సత్తువ రోజుల తరబడి వెంటాడుతుంటే అది డిప్రెషన్ కావచ్చు. ఆశ్చర్యకరంగా తీవ్రమైన డిప్రెషన్ కంటే సమస్య ప్రారంభ దశలోనే, రిస్క్ ఎక్కువగా ఉంటుందని పరిశోధనలు తేల్చాయి. ఎందుకంటే ఆ తొలి దశలో మనలో చాలామంది దానిని గుర్తించలేరు లేదా పట్టించుకోరు. అది తాత్కాలికమే అనుకుని వదిలేయడం, సరైన చికిత్స తీసుకోకపోవడం వల్ల ఈ ప్రారంభ దశే మరింత ప్రమాదకరంగా మారుతోంది. దీని వెనుక ఉన్న శాస్త్రీయ కారణాలు మరియు రిస్క్‌ను ఎలా తగ్గించుకోవాలో తెలుసుకుందాం.
గుర్తించడంలో వైఫల్యం : డిప్రెషన్ తొలిసారి మొదలైనప్పుడు, దాని లక్షణాలు (ఆసక్తి తగ్గడం, నిద్ర పట్టకపోవడం, నిస్సత్తువ) చాలా మంది సాధారణ జీవిత ఒత్తిడి లేదా అలసటగా భావిస్తారు. ఇది తీవ్రమైన అనారోగ్యంగా గుర్తించబడదు. ఈ నిర్లక్ష్యం వల్ల, చికిత్స పొందడం ఆలస్యమవుతుంది.
అస్థిరత్వం, ఆత్మహత్యా ఆలోచనలు: పరిశోధనల ప్రకారం, డిప్రెషన్ యొక్క తొలి లేదా ఉపశమన దశల్లో రోగుల మానసిక స్థితి చాలా అస్థిరంగా ఉంటుంది. ఈ అస్థిరమైన మానసిక స్థితి కారణంగా, ఆత్మహత్యా ఆలోచనలు లేదా వాటిని ఆచరణలో పెట్టే రిస్క్ ఎక్కువ ఉంటుందని తాజా అధ్యయనాలు సూచిస్తున్నాయి. తీవ్రమైన డిప్రెషన్ సమయంలో కంటే, లక్షణాలు కొద్దిగా ఉపశమనం పొందినప్పుడు లేదా మొదలైన కొత్తలో ఈ ప్రమాదం ఎక్కువగా ఉన్నట్లు తేలింది. చికిత్సతో కొంత తేలిక పడినప్పుడు, వారు ఆ ఆలోచనలను ఆచరణలో పెట్టడానికి అవసరమైన శక్తిని కూడా పొందుతారు.
సహాయ నిరాకరణ : ప్రారంభంలో ఇది కేవలం ‘మూడ్’ అనుకోవడం వలన, కుటుంబం మరియు స్నేహితుల నుండి సరైన మద్దతు లభించదు. ఒంటరితనం పెరిగి, పరిస్థితి మరింత దిగజారుతుంది.
డిప్రెషన్ అనేది కేవలం “మనసు బాలేదు” అని అనుకోవాల్సిన విషయం కాదు. ఇది మెదడు పనితీరుకు సంబంధించిన తీవ్రమైన వైద్య సమస్య. ఈ పరిశోధన వివరాలు మనకు ఒక ముఖ్యమైన పాఠాన్ని నేర్పుతాయి. తొలి లక్షణాలను నిర్లక్ష్యం చేయకూడదు. మీకు లేదా మీ చుట్టూ ఉన్నవారికి ఏమాత్రం మార్పు కనిపించినా, వెంటనే దానిని గుర్తించి, ఆలస్యం చేయకుండా సహాయం తీసుకోవడం ముఖ్యం.
ధైర్యంగా ఇతరులతో మాట్లాడటం, చికిత్స ప్రారంభించడం మరియు నిపుణుల మార్గదర్శకంలో ఉండటం ద్వారా డిప్రెషన్ రిస్క్‌ను మొదటి అడుగులోనే తగ్గించవచ్చు. మీరు ఒంటరివారు కాదు అని వారికీ ధైర్యం చెప్పటం ముఖ్యం అంటున్నారు నిపుణులు.
గమనిక: డిప్రెషన్ లక్షణాలు కనిపిస్తే లేదా మీకు ఆత్మహత్యా ఆలోచనలు ఉంటే, వెంటనే ఆలస్యం చేయకుండా సహాయం పొందండి. మీకు దగ్గరలో ఉన్న మానసిక ఆరోగ్య నిపుణులను సంప్రదించండి.
