ఈ రోజుల్లో చాలామంది ఆఫీస్ పనుల వల్లనో, టీవీలు చూస్తూనో రాత్రి భోజనాన్ని ఇష్టం వచ్చిన టైమ్కి తింటున్నారు. కానీ, ఇలా డిన్నర్ టైమ్ తరచూ మార్చడం వల్ల మన ఒంట్లోని జీవక్రియ పూర్తిగా దెబ్బతింటుంది. సూర్యాస్తమయం తర్వాత లేదా రాత్రి 7 నుండి 8 గంటల లోపు డిన్నర్ పూర్తి చేయడం వల్ల ఎన్నో హెల్త్ ప్రాబ్లమ్స్కి ఈజీగా గుడ్బై చెప్పవచ్చని నిపుణులు చెబుతున్నారు. ఆ వివరాలు చూద్దాం..
జీర్ణక్రియ మందగిస్తుంది జాగ్రత్త: మన శరీరం ఒక సహజ జీవ గడియారం (బాడీ క్లాక్) ప్రకారం పనిచేస్తుంది. పగటిపూట చురుగ్గా ఉండే మన జీర్ణవ్యవస్థ, రాత్రి అయ్యేసరికి నెమ్మదిస్తుంది. రాత్రి వేళల్లో ఆహారాన్ని అరిగించుకునే శక్తి శరీరానికి తగ్గుతుంది. ఇక అందుకే భోజనం ఆలస్యం అయితే అసిడిటీ, గ్యాస్, కడుపు ఉబ్బరం మరియు మలబద్ధకం వంటి సమస్యలు మనల్ని వేధిస్తాయి.
మధుమేహం (షుగర్) ముప్పు పెరుగుతుంది: అర్థరాత్రి దాటిన తర్వాత తినడం వల్ల శరీరంలో ఇన్సులిన్ ఉత్పత్తి గణనీయంగా తగ్గిపోతుంది. ఇక దీనివల్ల మనం తిన్న ఆహారం సరిగ్గా అరగక, రక్తంలో గ్లూకోజ్ స్థాయిలు అకస్మాత్తుగా పెరుగుతాయి. ఈ అలవాటు ఇలాగే రోజువారీగా కొనసాగితే, అది దీర్ఘకాలంలో ప్రమాదకరమైన షుగర్ (మధుమేహం) వ్యాధికి దారితీసే అవకాశం ఉందని హెచ్చరిస్తున్నారు.
బరువు పెరగడం ఖాయం: రాత్రి వేళల్లో మనం పెద్దగా శారీరక శ్రమ చేయం కాబట్టి శరీరానికి ఎక్కువ కేలరీలు అవసరం ఉండవు. ఇక ఆలస్యంగా తినడం వల్ల ఆ కేలరీలు ఖర్చు అవ్వవు. ఇక దాంతో ఆ అదనపు కేలరీలన్నీ కొవ్వుగా మారి పొట్ట, నడుము చుట్టూ పేరుకుపోతాయి. ఇది కాస్తా ఊబకాయానికి కారణమవుతుంది. కరెక్ట్ టైమ్కి తింటే బరువు అదుపులో ఉంటుంది.
ప్రశాంతమైన నిద్రకు ఆటంకం: మనం పడుకోవడానికి, తినడానికి మధ్య కనీసం 2 నుండి 3 గంటల గ్యాప్ ఖచ్చితంగా ఉండాలి. తిన్న వెంటనే పడుకుంటే ఆహారాన్ని అరిగించే ప్రాసెస్లో శరీర ఉష్ణోగ్రత పెరుగుతుంది. ఇక దీనివల్ల రాత్రి పూట హాయిగా గాఢ నిద్ర పట్టదు. నిద్రలేమి వల్ల ఉదయం లేవగానే అలసటగా, నీరసంగా అనిపిస్తుంది.
ఆరోగ్యంగా వందేళ్లు జీవించాలంటే కేవలం మంచి ఆహారం తినడమే కాదు, దాన్ని సరైన సమయానికి తినడం కూడా అంతే ముఖ్యం. రాత్రి వేళల్లో త్వరగా డిన్నర్ ముగించే అలవాటు చేసుకుంటే హాస్పిటల్స్ చుట్టూ తిరిగే పని లేకుండా, ఎంతో హ్యాపీగా, హెల్తీగా ఉండవచ్చు.
గమనిక: మీ బిజీ లైఫ్స్టైల్లో చిన్న చిన్న మార్పులు చేసుకొని రాత్రి 8 గంటల లోపే భోజనం ముగించడానికి ట్రై చేయండి. ఒకవేళ ఏదైనా కారణం వల్ల ఆలస్యం అయితే, తేలికగా అరిగే ఆహారాన్ని తక్కువ పరిమాణంలో తీసుకోవడం మంచిది.
