వినాయక చవితి అంటే కేవలం పూజలు, ప్రసాదాలు మాత్రమే కాదు.. మన ఇంటికి పండుగ కంటికి ఇంపుగా కనిపించేలా సిద్ధం చేసుకోవడం కూడా. స్వామివారిని ఇంట్లో ప్రతిష్ఠించే ముందు పూజా స్థలాన్ని, ఇంటిని పరిశుభ్రంగా ఉంచుకుంటే ఆ రోజు ప్రశాంతంగా, ఆనందంగా గడుస్తుంది. పెద్దగా ఖర్చు లేకుంటే కొన్ని చిన్న చిన్న టిప్స్ పాటిస్తూ పండుగ వాతావరణాన్ని ఎలా తెచ్చుకోవాలో, ఇంట్లో ఎలాంటి జాగ్రత్తలు తీసుకోవాలో ఇప్పుడు వివరంగా చూద్దాం.
ఇంటి పరిశుభ్రతే మొదటి అడుగు: వినాయకుడిని ఇంట్లోకి తీసుకువచ్చే ముందే ఇల్లంతా దుమ్ము, ధూళి లేకుండా శుభ్రం చేసుకోవాలి. ఇక ముఖ్యంగా పూజ చేసే స్థలంలో అనవసరమైన వస్తువులను తొలగించి శుభ్రంగా ఉంచాలి. అలానే ప్రతిష్ఠించే చోట అందరూ కూర్చోవడానికి, ప్రసాదాలు ఉంచడానికి సరిపడా స్థలం ఉందో లేదో చూసుకోవడం మంచిది.
సింపుల్గా పూజా మండపం: మండపం అలంకరణకు భారీగా ఖర్చు చేయాల్సిన అవసరం లేదు. ఇంట్లో లభించే పూలు, మామిడి ఆకులు, పచ్చని తోరణాలతోనే వేదికను ఎంతో అందంగా తీర్చిదిద్దవచ్చు. సహజమైన రంగు రంగుల పూలతో చిన్న మాలలు చేసి అలంకరిస్తే పండుగ శోభ ఉట్టిపడుతుంది.
పూజా సామాగ్రి ముందుగానే సిద్ధం: పూజ మొదలయ్యాక వస్తువుల కోసం వెతుక్కోకుండా పసుపు, కుంకుమ, పూలు, అక్షింతలు, దీపధూపాలు, కొబ్బరికాయలు ముందే అమర్చుకోవాలి. ఇక ఇలా అన్నింటినీ ఒకే చోట సిద్ధంగా ఉంచుకోవడం వల్ల పూజ సమయంలో ఎలాంటి హడావుడి లేకుండా ప్రశాంతంగా పూజ చేసుకోవచ్చు.
నైవేద్యాల కోసం ముందస్తు ప్లానింగ్: వినాయకుడికి ఎంతో ఇష్టమైన ఉండ్రాళ్లు, కుడుములు, పులిహోర, పాయసం వంటి నైవేద్యాల తయారీకి కావాల్సిన దినుసులను ముందురోజే తెచ్చి పెట్టుకోవాలి. ఇక దీనివల్ల పండుగ రోజు ఉదయాన్నే కిచెన్లో ఒత్తిడి లేకుండా వంటలు త్వరగా పూర్తవుతాయి.
లైట్లు, దీపాల విషయంలో జాగ్రత్తలు: మండపం దగ్గర అలంకరించే విద్యుత్ దీపాల వైర్లు పిల్లలకు అందకుండా జాగ్రత్తపడాలి. అలాగే మనం వెలిగించే ప్రమిదలు, అగరబత్తులు కర్టెన్లు లేదా త్వరగా మంటలు అంటుకునే వస్తువులకు కాస్త దూరంగా ఉండేలా చూసుకోవడం ఎంతో అవసరం.
ఇక అతిగా అలంకరించి పూజా స్థలాన్ని ఇరుకుగా మార్చకుండా, పరిశుభ్రతతో పాటు సింపుల్ అలంకరణలు చేస్తే పూజా గది చాలా ప్రశాంతంగా కనిపిస్తుంది. కుటుంబ సభ్యులందరూ కలిసి ఆనందంగా జరుపుకున్నప్పుడే ఆ వినాయక చవితి పండుగకు సంపూర్ణమైన శోభ వస్తుంది.
గమనిక: పూజా మండపం వద్ద ముగ్గులు వేసేటప్పుడు రసాయన రంగులకు బదులుగా సహజమైన బియ్యపు పిండి లేదా పూల రేకులను వాడితే ఇల్లు మరింత అందంగా, పర్యావరణహితంగా ఉంటుంది
