కార్తీ.. తమిళ నటుడు సూర్య తమ్ముడిగా తెలుగు తెరకు పరిచయమయ్యాడు. కానీ మొదటి సినిమా తోనే తన వర్సటాలిటీని నిరూపించుకున్నాడు. ఆ తర్వాత లవర్ బాయ్ ఇమేజ్ను సొంతం చేసుకున్నాడు. అలా క్లాస్, మాస్, ఫ్యామిలీ ఇలా అన్ని జోనర్లలో సినిమాలు చేస్తూ అన్ని వర్గాల ప్రేక్షకులను అలరిస్తూ వస్తున్నాడు. కార్తీకి తమిళనాడులోనే కాదు తెలుగు నాట ఫ్యాన్స్ ఉన్నారు. ఈ హీరో స్మైల్ అంటే పడిపోయే అమ్మాయిలెందరో. అందుకే కార్తీ తన సినిమాలను తెలుగులో కూడా రిలీజ్ చేస్తుంటాడు. ఇక అవకాశం వస్తే స్ట్రెయిట్ తెలుగు సినిమా చేయడానికి ఎప్పుడూ ముందుంటాడు. తనకు తెలుగు అభిమానులంటే చాలా ఇష్టమని కార్తీ మొదటి నుంచి చెబుతూనే వస్తున్నాడు.
తాజాగా కార్తీ నటించిన సినిమా జపాన్. రాజు మురుగన్‌ దర్శకత్వంలో రూపొందిన ఈ యాక్షన్ కామెడీ చిత్రంలో అను ఇమ్మాన్యుయేల్‌ హీరోయిన్గా నటించింది. నవంబరు 10న ప్రేక్షకుల ముందుకు వచ్చిన ఈ సినిమా బాక్సాఫీస్‌ వద్ద ఆశించిన విజయాన్ని అందుకోలేకపోయింది. ఈ క్రమంలో ఓటీటీ వేదికగా ‘జపాన్’ విడుదలయ్యేందుకు సిద్ధమైంది. డిసెంబరు 11వ తేదీన ప్రముఖ ఓటీటీ నెట్‌ఫ్లిక్స్‌ వేదికగా తమిళ, తెలుగు, కన్నడ, మలయాళ భాషల్లో స్ట్రీమింగ్‌ కానుంది.
