ఇప్పుడు ఎక్కడ చూసినా కల్కి మూవీ మేనియానే కనిపిస్తోంది. ప్రభాస్ హీరోగా నాగ్‌ అశ్విన్‌ దర్శకత్వంలో తెరకెక్కిన కల్కి 2898 ఏడీ జూన్27న రిలీజ్ కానుంది. ఈ క్రమంలో ఆదివారం(జూన్ 23) సాయంత్రం నుంచి తెలంగాణలో బుకింగ్స్ ఓపెన్‌ అయ్యాయి. అయితే ఈ సినిమా టికెట్స్ బుక్ చేసుకుందామనుకున్న అభిమానులకు చిన్న షాక్ తగిలింది. అదేంటంటే ?
బుక్‌మై షో, పేటీఎం, జస్ట్‌ టికెట్స్ వంటి యాప్లలో ఆడియెన్స్ టికెట్స్ బుక్ చేస్తున్నారు. అయితే బుక్ మై షోలో కల్కి 2898 ఏడీ టికెట్‌ను బుక్ చేసుకుంటే రాజశేఖర్‌, ప్రశాంత్‌ వర్మ కాంబోలో గతంలో వచ్చిన కల్కి మూవీకి టికెట్ బుక్ అయినట్లు కనిపిస్తోందట. టికెట్‌ను త్వరగా బుక్ చేయాలన్న ఆలోచనలో ఫ్యాన్స్ దాన్ని గమనించకుండా.. మనీ ట్రాన్సెక్షన్ పూర్తైన తర్వాత టికెట్ డౌన్‌లోడ్‌ చేయగా, దానిపై రాజశేఖర్‌ కల్కి పోస్టర్‌ కనిపించడంతో షాకవుతున్నారు.
ఇదే విషయమై ఎక్స్‌ వేదికగా బుక్ మై షోకు పోస్ట్ పెట్టగా ఎలాంటి కంగారు పడాల్సిన అవసరం లేదని, ప్రభాస్ కల్కికే టికెట్ బుక్ అయిందని, సాంకేతిక సమస్యను త్వరలోనే పరిష్కరిస్తామని స్పష్టత ఇచ్చింది. దీంతో టికెట్లు బుక్ చేసుకున్న వాళ్లంతా ఊపిరి పీల్చుకున్నారు.
