టాలీవుడ్ యంగ్ హీరో నవీన్ పొలిశెట్టి ప్రస్తుతం ‘మిస్‌ శెట్టి మిస్టర్‌ పొలిశెట్టి’ సినిమా ప్రమోషన్స్లో బిజీగా ఉన్నారు. ఇందులో భాగంగానే తాజాగా హైదరాబాద్లోని ఓ మాల్లో మీట్ అండ్ గ్రీట్ కార్యక్రమంలో పాల్గొన్నారు. అయితే ఈ ప్రోగ్రామ్లో నవీన్ పొలిశెట్టి తన అభిమానులకు క్షమాపణలు చెప్పారు. ఈ సినిమా చిత్రీకరణకు అధిక సమయం పట్టిందని, పోస్ట్‌ ప్రొడక్షన్‌ పనుల వల్ల విడుదల ఆలస్యం అయిందని, ఆ తప్పు జరిగినందుకు తమను మన్నించాలని పొలిశెట్టి ప్రేక్షకులను కోరారు. ఎప్పుడో విడుదల కావాల్సిన సినిమా ఆలస్యమై వారిని నిరాశకు గురిచేసిందనే ఉద్దేశంతో ఆయన మాట్లాడారు.
దర్శకుడు పి. మహేశ్‌ తెరకెక్కించిన ఈ సినిమాలో అనుష్క శెట్టి కథానాయిక. ఈ సినిమా ఈ నెల 7న ప్రేక్షకుల ముందుకు రానుంది. ఈ సినిమాలో స్టాండప్‌ కమెడియన్‌గా నవీన్, చెఫ్‌గా అనుష్క సందడి చేయనున్నారు. ‘జాతిరత్నాలు’ (2021) తర్వాత నవీన్, ‘నిశ్శబ్దం’ (2020) తర్వాత అనుష్క నటించిన చిత్రం ఇదేకావడంతో ఇరువురి అభిమానులు ‘మిస్‌ శెట్టి మిస్టర్‌ పొలిశెట్టి’ కోసం ఎంతో ఆసక్తిగా ఎదురుచూస్తున్నారు.
