‘పుష్ప’ ఫేం జగదీశ్ గురించి తెలియని వారుండరు. అదేనండి ఆ సినిమాలో అల్లు అర్జున్‌ పక్కన కేశవ పాత్రలో కనిపించిన సహాయ నటుడిపై పంజాగుట్ట పోలీస్‌ స్టేషన్‌లో కేసు నమోదైంది. ఓ జూనియర్‌ అర్టిస్టు మరో వ్యక్తితో ఉన్నప్పుడు ఫొటోలు తీసి వాటిని సోషల్‌ మీడియాలో పోస్టు చేస్తానని బెదిరింపులకు పాల్పడిన కేసులో అతడిని అరెస్టు చేసినట్లు పంజాగుట్ట పోలీసులు తెలిపారు. ఈ కేసులో జగదీశ్‌ను ఇవాళ కోర్టులో హాజరుపర్చినట్లు వెల్లడించారు.
జగదీశ్ వేధింపులతో పంజాగుట్ట పరిధిలో నివాసం ఉంటున్న ఓ మహిళ (జూనియర్‌ అర్టిస్టు) గత నెల 29న ఉరేసుకొని ఆత్మహత్య చేసుకుంది. ఈ ఘటనపై మహిల తండ్రి పోలీసులకు ఫిర్యాదు చేశారు. కేసు నమోదు చేసి దర్యాప్తు చేపట్టిన పోలీసులు మహిళ ఆత్మహత్యకు గల కారణాలను తెలుసుకున్నారు.
పోలీసులు తెలిపిన ప్రకారం.. “మహిళ గత నెల 27న ఓ వ్యక్తితో ఉన్న సమయంలో ఆమెకు తెలియకుండా జగదీశ్ ఫొటోలు తీసి ఆ తర్వాత ఆమెను బెదిరించాడు. మనస్తాపానికి గురైన మహిళ ఉరేసుకొని ఆత్మహత్య చేసుకుంది. ఈ కేసులో అప్పటి నుంచి తప్పించుకుని తిరుగుతున్న బండారు జగదీశ్‌ను ఇవాళ అరెస్టు చేసి రిమాండ్‌కు తరలించాం. ఆత్మహత్య చేసుకున్న మహిళతో గతంలో జగదీశ్‌కు సినీ రంగంలో పరిచయం ఉంది” అని పోలీసులు తెలిపారు.
