టాలీవుడ్ యంగ్ హీరో సిద్ధు జొన్నలగడ్డ టిల్లు స్వ్కేర్ సక్సెస్ తో జోష్ లో ఉన్నాడు. 2022లో రిలీజైన ‘డీజే టిల్లు’కు సీక్వెల్గా తెరకెక్కిన ‘టిల్లు స్వ్కేర్’ మార్చి 29వ తేదీన విడుదలై భారీ విజయం సొంతం చేసుకుంది. హీరో సిద్ధు జొన్నలగడ్డ ఈ సినిమాకు స్క్రిప్టు అందించగా, దర్శకుడు మల్లిక్ రామ్ రొమాంటిక్ డ్రామాగా చిత్రాన్ని తెరకెక్కించారు. ఈ సినిమాకు మూడో పార్ట్ ‘టిల్లు క్యూబ్’ కూడా ఉంటుందని పార్ట్-2లో హింట్ ఇచ్చిన విషయం తెలిసిందే.
తొలి రెండు భాగాల కంటే ‘టిల్లు క్యూబ్’పై కూడా అంచనాలు భారీగానే ఏర్పడ్డాయి. తాజాగా సినిమా నుంచి ఓ క్రేజీ అప్డేట్ నెట్టింట వైరల్ అవుతోంది. ఈ సినిమాలో సిద్ధుతో పాటు మరో స్టార్ హీరో కూడా నటించనున్నాడట. సినిమా మూడో భాగం కోసం స్క్రిప్ట్ పనులు త్వరలోనే ప్రారంభం కానున్నాయట. ఇందులో నటించనున్న స్టార్ హీరోకు మంచి పాత్ర రెడీ చేస్తున్నట్లు సమాచారం. అయితే ఆ హీరో ఎవరన్న విషయం ఇప్పటికైతే తెలియదు. దీనిపై అధికారిక సమాచారం రావాల్సి ఉంది.
