కుర్తా పైజామా ఖ‌రీదు మహా అయితే ఎంత ఉంటుంది ? త‌క్కువ ఖ‌ర్చులో అయితే రూ.500 కే రెండూ వ‌స్తాయి. లేదా రూ.1వేయి నుంచి రూ.2వేల వ‌ర‌కు ఒక రేంజ్‌లో వాటిని కొనుగోలు చేయ‌వ‌చ్చు. కానీ ఎవ‌రైనా స‌రే ఆ డ్రెస్‌ను రూ.ల‌క్ష‌లు పెట్టి కొనుగోలు చేస్తారా ? లేదు క‌దా. అవును, అందుక‌నే రూ.ల‌క్ష‌ల ఖ‌రీదు గ‌ల కుర్తా పైజామాను విక్ర‌యిస్తున్నందుకు ఆ కంపెనీని నెటిజ‌న్లు ట్రోల్ చేస్తున్నారు.
ప్రముఖ ఇటాలియ‌న్ ఫ్యాషన్ హౌజ్ కంపెనీ Gucci ఇండియ‌న్ కుర్తా పైజామా డ్రెస్‌ను త‌న స్టోర్‌లో సేల్‌కు ఉంచింది. దాని ఖ‌రీదు ఎంతో తెలుసా ? అక్ష‌రాలా 2100 డాల‌ర్లు. అంటే మ‌న క‌రెన్సీలో దాదాపుగా రూ.1.50 ల‌క్ష‌ల‌న్న‌మాట. ఇక ఇందులోనే ఇంకాస్త ఖ‌రీదైన మోడ‌ల్ కావాలంటే 3500 డాల‌ర్లు చెల్లించాలి. అంటే రూ.2.50 ల‌క్ష‌ల‌న్న‌మాట. ఈ క్ర‌మంలోనే Gucci కంపెనీ ఈ డ్రెస్‌ను స్టోర్‌లో సేల్‌కు ఉంచ‌గానే ఆ విష‌యం తెలుసుకున్న భార‌త నెటిజ‌న్లు Gucci కంపెనీని ట్రోల్ చేస్తున్నారు.
రూ.500 కు ల‌భించే ఆ డ్రెస్‌ను రూ.2.50 ల‌క్ష‌లు పెట్టి ఎవ‌రైనా కొనుగోలు చేస్తారా ? పిచ్చివాళ్లు అయితేనే అంత‌టి భారీ ధరకు ఆ డ్రెస్‌ను విక్ర‌యిస్తారు. వీధి వ్యాపారుల వ‌ద్ద ఇదే డ్రెస్‌ను రూ.100 కే కొంటా. కావాలంటే చూడండి.. అంటూ నెటిజ‌న్లు ర‌క ర‌కాల కామెంట్లు పెడుతున్నారు.
అయితే Gucci ట్రోల్స్ బారిన ప‌డ‌డం ఇదేం కొత్త కాదు. 2019 ఆరంభంలో సిక్కులు ధ‌రించే ఓ ట‌ర్బ‌న్‌ను 790 డాల‌ర్ల‌కు (రూ.57వేల‌కు) స్టోర్‌లో విక్ర‌యానికి ఉంచింది. దీంతో ఆ వ‌ర్గానికి చెందిన వారు Gucci ని విమ‌ర్శించారు. ఆధ్యాత్మిక‌త‌తో ముడిప‌డి ఉన్న ట‌ర్బ‌న్‌ను అంత‌టి భారీ ధరకు ఎలా విక్ర‌యిస్తార‌ని వారు ఆగ్ర‌హం వ్య‌క్తం చేశారు. అయితే ఇప్పుడు తాజాగా కుర్తా పైజామాతో మ‌ళ్లీ Gucci ట్రోల్స్ బారిన ప‌డుతోంది.
