మనలో చాలామంది అన్నం వండిన సమయంలో వచ్చే గంజిని బయట పడేస్తుంటారు. అయితే ఈ గంజి వల్ల అనేక ప్రయోజనాలు ఉన్నాయి. పోషకాలు పుష్కలంగా ఉండే గంజిని తీసుకుంటే మన శరీరానికి అనేక ఆరోగ్య ప్రయోజనాలు కలుగుతాయి. చాలామంది శరీరం చల్లగా ఉండటం కోసం మజ్జిగ కలుపుకుని తింటూ ఉంటారు. అయితే అన్నంలోకి గంజి కలుపుకుని తిన్నా అవే ఆరోగ్య ప్రయోజనాలు మనకు కలుగుతాయి.
నీరసంగా ఉన్నవాళ్లు గంజిలోకి ఉప్పు లేదా నిమ్మరసం వేసుకుని తాగితే తక్షణమే శరీరానికి కావాల్సిన శక్తి లభిస్తుంది. జ్వరంతో బాధ పడుతున్న వారికి గంజి దివ్యౌషధంలా పని చేస్తుంది. విటమిన్ల లోపం సమస్యతో బాధ పడే వాళ్లు గంజిని తాగితే ఆ సమస్యను సులభంగా అధిగమించవచ్చు. గంజి రోజూ తీసుకునే వాళ్లలో చర్మం మృదువుగా ఉండటంతో పాటు చర్మ సంబంధిత వ్యాధుల బారిన పడే అవకాశాలు తగ్గుతాయి.
కొందరు పసిపిల్లలు పాలు సరిగ్గా తాగకుండా ఉంటారు. అలాంటి పిల్లలకు గంజి ఇస్తే మంచిదని నిపుణులు సూచిస్తున్నారు. డయేరియా సమస్యను తగ్గించడానికి గంజి సహాయపడుతుంది. శరీర ఉష్ణోగ్రతను నియంత్రించడంలో గంజి సహాయపడుతుంది. అసిడిటీ సమస్యతో బాధ పడే వాళ్లు గంజిని తీసుకుంటే మంచిది. దురద సమస్యతో బాధ పడే వాళ్లు గంజితో మర్ధన చేసుకుంటే మంచి ఫలితాలు ఉంటాయి. జీర్ణ సంబంధిత సమస్యలను దూరం చేయడంతో పాటు జీర్ణ వ్యవస్థను మెరుగుపరచడంలో గంజి సహాయపడుతుంది.
