టీమ్ఇండియా దృష్టి అంతా జూన్‌లో ప్రారంభమయ్యే టీ20 ప్ర‌పంచ‌క‌ప్ 2024 పైనే ఉంది. ఈ మెగా టోర్నీని వెస్టిండీస్, అమెరికా దేశాలు సంయుక్తంగా ఆతిథ్యం ఇస్తున్నాయి.జూన్ 1 నుంచి పొట్టి ప్ర‌పంచ‌క‌ప్ ఆరంభం కానుంది. ఇక క్రికెట్ ప్రేమికులు ఎంతో ఆస‌క్తిగా ఎదురుచూసే భారత్, పాకిస్తాన్ జ‌ట్ల మ‌ధ్య మ్యాచ్‌ జూన్ 9న న్యూయార్క్ వేదిక‌గా జ‌రగ‌నుంది.
కాగా.. ఈ T20 ప్రపంచ కప్ ను స్టార్‌స్పోర్ట్స్ ప్ర‌త్య‌క్ష ప్ర‌సారం చేయ‌నుంది. ఈ క్ర‌మంలో స్టార్‌స్పోర్ట్స్ భారత్, పాకిస్తాన్ మ్యాచ్‌కు సంబంధించి సోష‌ల్ మీడియాలో చేసిన పోస్ట్ వైర‌ల్‌గా మారింది. చిర‌కాల ప్ర‌త్య‌ర్థులు భారత్, పాక్ పోరు జూన్ 9న తలపడనున్నయనే విష‌యాన్ని తెలియ‌జేస్తూ హార్దిక్ పాండ్య, ష‌హీన్ అఫ్రిది ఫోటోతో కూడిన పోస్ట‌ర్‌ను షేర్ చేసింది. అయితే.. పాకిస్తాన్ జ‌ట్టు ష‌హీన్ అప్రిది కెప్టెన్సీ లో టీ20 ప్ర‌పంచ‌క‌ప్ బ‌రిలోకి దిగ‌నుండ‌గా, టీమ్ఇండియా ఎవ‌రి కెప్టెన్సీ లోఆడ‌నుంది అనే దానిపై క్లారిటీ లేదు.
ఈ నేప‌థ్యంలో హార్దిక్ పాండ్య ఫోటోను వాడ‌డం పై కొంద‌రు ఫ్యాన్స్ అభ్యంత‌రం వ్య‌క్తం చేస్తున్నారు. రోహిత్ శ‌ర్మ కెప్టెన్సీ లోని టీమ్ఇండియా టీ20 వరల్డ్ కప్ బ‌రిలోకి దిగాల‌ని కోరుకుంటున్నారు. అధికారికంగా టీ20ల నుంచి రోహిత్ శ‌ర్మ రిటైర్‌మెంట్ తీసుకోలేదని అలాంట‌ప్పుడు హార్దిక్ పాండ్య ఫోటోల‌ను ఎలా వాడుతారు అని కామెంట్లు పెడుతున్నారు.
