ఆంధ్రప్రదేశ్ లో వైసీపీ నేతలకు షాక్ ల మీద షాక్ లు తగులుతున్నాయి. సీఎం చంద్రబాబు నివాసం పై దాడి కేసులో మాజీ మంత్రి జోగి రమేష్ కు మరోసారి పోలీసులు నోటీసులు జారీ చేశారు. ఈ నేపథ్యంలో మంగళగిరి డీఎస్పీ కార్యాలయంలో విచారణకు హాజరు కావాలని నోటీసుల్లో పేర్కొన్నారు. ఈ కేసులో ఇప్పటికే రెండు సార్లు జోగి రమేష్ విచారణకు హాజరైన విషయం విధితమే. తాజాగా మరోసారి మంగళగిరి డీఎస్పీ ఆధ్వర్యంలో ఆయనను విచారిస్తున్నారు.
ఈ కేసులో నిందితులుగా ఉన్న జోగి రమేష్, దేవినేని అవినాష్ లు తొలుత ముందస్తు బెయిల్ కోసం ఏపీ హైకోర్టును ఆశ్రయించగా.. వారి పిటిషన్ ను తిరస్కరించింది కోర్టు. ఈ నేపథ్యంలో వీరు సుప్రీంకోర్టును ఆశ్రయించారు. దీంతో వారికి భారీ ఊరట లభించింది. వారిద్దరిపై ఎలాంటి తక్షణ చర్యలు తీసుకోకుండా సుప్రీంకోర్టు మధ్యంతర ఉత్తర్వులు ఇచ్చింది. కానీ పోలీసుల విచారణకు పూర్తిగా సహకరించాలని స్పష్టం చేసింది.
