తిరుమల శ్రీవారి భక్తులకు గుడ్ న్యూస్. ఈ ఏడాది వైకుంఠ ఏకాదశి నాడు ఉత్తర ద్వార దర్శనానికి సంబంధించిన టికెట్లను తిరుమల తిరుపతి దేవస్థానం విడుదల చేసింది. డిసెంబర్ 23వ తేదీన వైకుంఠ ఏకాదశిని పురస్కరించుకుని వైకుంఠ ఏకాదశి ద్వార దర్శన టికెట్లను విడుదల చేసినట్లు టీటీడీ అధికారులు తెలిపారు. డిసెంబరు 23వ తేదీ నుంచి జనవరి 1వ తేదీ వరకు కొనసాగనున్నట్లు వెల్లడించారు.
ఈ వైకుంఠ ద్వార దర్శనానికి సంబంధించిన రూ.300 ప్రత్యేక ప్రవేశ దర్శన టికెట్ల(ఎస్‌ఈడీ)ను ఈరోజు ఉదయం 10 గంటలకు టీటీడీ విడుదల చేసింది. మొత్తం 2.25 లక్షల టికెట్లను ఆన్లైన్లో అందుబాటులోకి తీసుకువచ్చింది. భక్తులు ttddevasthanam.ap.gov.in వెబ్సైట్లో టికెట్లు బుక్ చేసుకోవచ్చని టీటీడీ సూచించింది.
మరోవైపు మధ్యాహ్నం 3 గంటలకు శ్రీవాణి ట్రస్టు దర్శన టికెట్ల కోటాను విడుదల చేయనున్నట్లు టీటీడీ అధికారులు తెలిపారు. రోజుకు 2 వేల టికెట్ల చొప్పున.. 10 రోజుల పాటు 20 వేల టికెట్లను విడుదల చేస్తామని వెల్లడించారు. సాయంత్రం 5 గంటలకు వసతి గదుల కోటాను అందుబాటులో ఉంచుతామని పేర్కొన్నారు.
