హైదరాబాద్ నగరంలోని టోలిచౌకిలో ఓ రౌడీషీటర్ వీరంగం సృష్టించాడు. నడిరోడ్డుపై అందరూ చూస్తుండగానే ఓ వ్యక్తిపై పిడిగుద్దులతో దాడికి పాల్పడ్డాడు. స్థానికుల కథనం ప్రకారం.. టోలిచౌకి ప్రాంతానికి చెందిన అమీనుద్దీన్ ఇటీవలే హజ్ యాత్ర ముగించుకొని హైదరాబాద్ చేరుకున్నాడు. సోమవారం రాత్రి రోడ్డు పక్కన నిలబడి ఉన్న అమీన్‌పై షాకీర్ అనే రౌడీ షీటర్ ద్విచక్ర వాహనంపై వచ్చి దాడికి పాల్పడ్డాడు.
అమీనుద్దీన్‌పై పిడిగుద్దులు గుద్దతూ విచక్షణారహితంగా కొట్టాడు. అందరూ చూస్తుండగానే అమీన్‌పై దాడి చేయగా.. ఆ దృష్యాలు సీసీ కెమెరాలో రికార్డ్ అయ్యాయి. దీంతో బాధితుడు ఫిలింనగర్ పోలీస్‌స్టేషన్ లో ఫిర్యాదు చేశాడు. సీసీ కెమెరాల ఫుటేజీ ఆధారంగా షాకీర్‌ను పోలీసులు గుర్తించారు. ఇదివరకే అతని పేరు రౌడీ షీటర్ గా పోలీసుల రికార్డుల్లో ఉందని గుర్తించారు. ఈ మేరకు కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు.
