కుమురంభీం జిల్లా సిర్పూర్-టి మండలంలో ఎలుగుబంటి హల్చల్ సృష్టించింది. వేర్వేరు చోట్ల తెల్లవారుజామున ఇద్దరిపై దాడి చేసింది. నవేల్లి గ్రామానికి చెందిన అవనిధర్ గౌడ్ గ్రామ శివారులో మార్నింగ్ వాక్ కోసం వెళ్లిన వ్యక్తిపై పొదల్లో నుంచి ఒక్కసారిగా ఎలుగుబంటి దూకింది. ఈ ఘటనలో వ్యక్తి తీవ్రంగా గాయపడ్డాడు. గమనించిన స్థానికులు ఎలుగుబంటిని అక్కడి నుంచి తరిమేశారు.
అదే ఎలుగుబంటి టోంకిని ప్రాంతంలో చౌదరి భువనేశ్వర్ మెుక్కజొన్న చేనుకు నీళ్లు పెట్టి వస్తుండగా మరో వ్యక్తిపై దాడి చేసింది. ఎలుగు నుంచి తప్పించుకునేందుకు ఆ రైతు తీవ్రంగా శ్రమించాడు. వీరిద్దరికీ తీవ్ర గాయాలు కావడంతో స్థానిక ఆసుపత్రులకు తరలించారు. ఎలుగుబంటి దాడి ఘటనతో స్థానికులు భయాందోళనకు గురవుతున్నారు. ఎలుగుబంటి సంచారం పై గ్రామస్థులు అటవీశాఖ అధికారులకు సమాచారమిచ్చారు.
